Франция янги баллистик ракетасини синовдан ўтказди

Франция атом сувости кемасидан M51.3 стратегик баллистик ракетасининг илк парвозини ўтказди. Бу ҳақда мамлакат Мудофаа вазирлиги хабар берди.

Қайд этилишича, синов парвози бугун, 6 октябрь куни бўлиб ўтган. Ракета ядровий каллакка эга бўлмаган, унинг парвози Франция Қуролланиш бўйича бош дирекциясининг (DGA) синов маркази воситалари томонидан кузатиб борилган.

Ракета Атлантика океанининг шимолий қисмида, соҳилдан бир неча юз километр узоқликда қулаган. Ҳарбий идора синов Франциянинг халқаро мажбуриятларига риоя қилинган ҳолда ўтказилганини қайд этган.

“Le Parisien” нашрининг Елисей саройига таяниб ёзишича, синов жараёнини Франция Президенти Эммануэль Макрон кузатиб борган.

Маълумот учун, M51.3 Франциянинг денгизда жойлаштириладиган M51 стратегик баллистик ракетасининг учинчи версияси ҳисобланади. У тахминан бир йил аввал фойдаланишга топширилган. M51 – сувости кемаларига ўрнатиладиган Франция баллистик ракетаси. Максимал учиш масофаси 9-10 минг км, учиш вазни 52 тоннадан бошланади. Ракета ишлаб чиқувчиси – Амстердамда расман рўйхатдан ўтган, аммо қароргоҳи Парижда жойлашган Европа аэрокосмик ва мудофаа концерни (EADS) ҳисобланади.