Финляндия Россия билан чегарада 200 километрлик тиканли сим тортди

Финляндия умумий узунлиги 200 км бўлган чегара тўсиғини қуришни якунлади. Бу ҳақда Yle нашри хабар берди.

Қайд этилишича, лойиҳа қиймати 356 миллион еврони ташкил этган. Тўсиқ металл тўрли девор, патруль хизмати учун йўл, ўрмондан тозаланган йўлак ва техник кузатув тизимидан иборат. У Лапландиядан тортиб Фин қўлтиғи соҳилигача бўлган 1300 километрдан ортиқ узунликдаги чегаранинг алоҳида участкаларини қамраб олади.

Шунингдек, 21 август куни Yle нашри 200 километрлик тўсиқ тўлиқ тиклангани, бироқ пардозлаш ишлари давом этаётгани ҳақида ёзган. Тўсиқ Фин қўлтиғи соҳилидан Лапландиягача бўлган алоҳида участкалардан иборат: тиканли сим ўрнатилган металл тўрли девор ўрмонлар, далалар, қояли ва ботқоқлик ҳудудлари орқали ўтади. Чегара бўйлаб дарахтлар кесиб ташланган, йўл ётқизилган ва кузатув тизими ўрнатилган, мураккаб участкаларда эса кўприк конструкциялари ва понтонлар ишлатилган.

Қурилиш тахминан минг нафар ер эгаларининг ерларига таъсир кўрсатган. Уларга давлат 3 миллион еврога яқин компенсация тўлаб берган. Улардан бири, Виролахтидан бўлган пенсионер Раймо Йокела қариндоши билан бирга тўсиқ йўналиши бўйича маъмурий судга шикоят қилган, аммо ютқазган. Унинг сўзларига кўра, қурилишдан сўнг оилавий далаларни ижарага беришдан олинадиган даромад камайган. Бу ҳудуддаги ер XIX асрдан бери унинг оиласига тегишли.

Эслатиб ўтамиз, аввалроқ Россия Карелияда – Финляндия чегарасидан бор-йўғи бир неча ўн километр узоқликда янги ҳарбий шаҳарча қуришни бошлагани ҳақида хабар берилган эди.