Ferrari’нинг илк электромобили аукционда рекорд нархга сотилди

Ferrari’нинг Luce версиясидаги илк электр автомобили Калифорнияда RM Sotheby’s хайрия аукционида 40 миллион долларга сотилиб, аукционда сотилган энг қиммат янги автомобил бўлди. Бу ҳақда “Bloomberg” хабар берди.

Қайд этилишича, савдолар Monterey Car Week автомобиль ҳафталиги доирасида ўтказилган. Аукционга Chassis 0 дастури асосида яратилган Luce’нинг ноёб версияси – моделнинг биринчи сериявий нусхаси қўйилган.

Нашрга кўра, автомобиль савдосидан тушган барча маблағ Ferrari’нинг ўз хайрия жамғармасига ўтказилиб, таълим дастурларига йўналтирилади.

Маълумот учун, аввалги рекорд ҳам Ferrari’га тегишли бўлган. 2025 йилда индивидуал буюртма асосида ишланган Daytona SP3 худди шундай хайрия аукционида 26 миллион долларга сотилган эди.

Ferrari компанияси Luce моделини 2026 йил май ойида тақдим этган. Компаниянинг биринчи электромобилининг базавий нархи 550 минг еврони ташкил этади. Аукциондаги нусха эса бу қийматдан тахминан 63 баравар қимматга сотилган.

Luce автомобили Apple’нинг собиқ бош дизайнери, iPhone ва iMac дизайни яратувчиларидан бири Жони Айв асос солган LoveFrom студияси билан ҳамкорликда ишлаб чиқилган. Тўрт эшикли электромобиль жами қуввати 1 000 от кучидан юқори бўлган тўртта электр двигатели билан жиҳозланган.

Ferrari бош директори Бенедетто Винья модел тақдимотидан кейин компания доимий мижозлардан ҳам, янги харидорлардан ҳам буюртмалар олаётганини айтган.

Қайд этилишича, рекорд ўрнатган автомобилни харидор дарҳол олмайди. Аукциондан сўнг автомобиль якуний йиғиш учун Ferrari’нинг Маранеллодаги заводига қайтарилади ва уни эгасига 2027 йил биринчи чорагида топшириш режалаштирилган.

Эслатиб ўтамиз, аввалроқ етти карра жаҳон чемпиони Михаэль Шумахернинг 1997 йилги Бельгия Гран-присида бошқарган “Ferrari F310 B” автомобили жорий йилнинг январь ойи охирида кимошди савдосига қўйилганди.