Фаластин Президенти ҳам шифохонанинг портлатилиши туфайли Иорданияга бормайди

Фаластин Президенти Маҳмуд Аббос Исроилнинг Ғазо секторидаги Ал-Аҳли шифохонасига берган зарбаси сабабли Иорданияга ташрифини тўхтатди. Бу ҳақда Фаластинни озод қилиш ташкилоти Ижроия қўмитаси бош котиби Ҳусайн аш-Шайх ижтимоий тармоқларда маълум қилди.

Аббос тўрт томонлама учрашувда иштирок этиш учун Амманда бўлган. Бироқ шифохонага қилинган ҳужумдан сўнг, ватанига қайтган.

Ҳусайн аш-Шайхга кўра, Маҳмуд Аббос Фаластин маъмурияти раҳбарлари билан фавқулодда йиғилиш ўтказади.

Маълумот учун, Иордания пойтахти Амманда АҚШ Президенти Жо Байден, Иордания қироли Абдулла II, Миср Президенти Абдулфаттоҳ ас-Сиси ва Фаластин раҳбари Маҳмуд Аббос иштирокида тўрт томонлама учрашув бўлиб ўтиши керак эди.

Эслатиб ўтамиз, кеча, 17 октябрь куни тунда Ғазо секторидаги Ал-Аҳли шифохонасига ҳужум қилиниши оқибатида 800 киши ҳалок бўлганди. Ушбу ҳужум фонида АҚШ Президенти Жо Байден ҳам Иорданияга ташрифини қолдирганди.