Фьюри ва Жошуанинг жанги 200 миллион долларга баҳоланмоқда

Британиялик боксчилар Тайсон Фьюри ва Энтони Жошуа ўзаро жанг учун тахминан 200 миллион долларлик маблағни бўлишиб олади. Бу ҳақда “The Athletic” хабар берди.

Жанг жорий йилнинг 11 декабрь куни Уэльснинг Кардифф шаҳридаги “Милленниум” стадионида бўлиб ўтади.

Манбага кўра, жанг ўтказиладиган жой борасидаги келишмовчиликлар туфайли музокаралар бир неча бор барбод бўлиш арафасида турган. Жангни молиялаштираётган томонлар уни Нью-Йоркда ўтказишни истаган, Фьюри эса АҚШда жанг қилишга тайёр бўлган. Бироқ Жошуа ва унинг промоутери беллашув Буюк Британияда ўтказилишини талаб қилган.

Якунда томонлар Кардифф вариантига тўхталган. Ёпиқ стадион декабрь ойидаги жангни ўтказиш, шунингдек, тадбирни халқаро аудитория учун намойиш этиш имконини беради.

Маълумот учун, 38 ёшли Тайсон Фьюри профессионал фаолияти давомида 36 та ғалаба, 2 та мағлубият ва 1 та дуранг қайд этган. Британиялик боксчи фаолияти давомида WBA, WBO, IBO, IBF ва WBC версиялари бўйича чемпионлик камарларига эга бўлган. Фьюри жорий йилнинг июль ойида 2026 йил боксдаги фаолиятининг сўнгги йили бўлишини маълум қилган.

36 ёшли Энтони Жошуа эса 2025 йил 29 декабрь куни Нигерияда икки кишининг ҳаётига зомин бўлган йўл-транспорт ҳодисасидан сўнг январь ойида машғулотларга қайтган. У профессионал боксда 30 та ғалаба ва 4 та мағлубият қайд этган. Жошуа фаолияти давомида IBF, WBA, WBO ва IBO версиялари бўйича чемпионлик камарларини қўлга киритган.