Эрон самолёти санкция сабаб Душанбега кўна олмади

Бугун, 24 сентябрь куни Эроннинг Varesh Airlines авиакомпаниясига тегишли Теҳрон–Душанбе рейси парвозга чиққанидан сўнг йўналишини ўзгартириб, Теҳрондаги Имом Хомайний аэропортига қайтишга мажбур бўлди. Бу ҳақда “Rooziato” нашри хабар берди.

Қайд этилишича, самолётнинг қайтишига Тожикистонга қўшни айрим давлатлар ҳаво ҳудудидан фойдаланиш учун берилган рухсатларнинг кутилмаганда бекор қилингани сабаб бўлган.

Эронлик медиа фаоли Али Қалҳакий Telegram-каналида Varesh Airlines самолёти Душанбега парвоз вақтида ҳаво ҳудудидан ўтиш рухсати бекор қилингани сабабли Имом Хомайний аэропортига қайтганини маълум қилган.

Сўнгги кунларда Эрон авиакомпанияларининг айрим хорижий йўналишлардаги парвозларига турли чекловлар жорий этилгани қайд этилмоқда. Жумладан, Эроннинг Ироқ, Уммон ва Озарбайжонга амалга оширадиган айрим рейслари ҳам бундай чекловлардан азият чеккан.

Ҳозирча самолётнинг айнан қайси давлат ҳаво ҳудудидан ўтишига рухсат берилмагани ва чекловнинг сабаблари ҳақида расмий маълумот берилмаган.

Эслатиб ўтамиз, аввалроқ АҚШ томонидан Эрон авиация соҳасига қарши жорий этилган санкциялар Туркияни Эронга ўз рейсларини бекор қилишга ва унинг авиакомпанияларидан бирининг парвозларини тақиқлашга мажбур қилганди.