Эрдўғанни диктатор деб, Қуръон ҳақида ҳазил қилган комик суд қилинадиган бўлди

Туркияда стендаплари билан танилган қизиқчи Дениз Кўктош 12 йил қамоқ жазосига ҳукм қилиниши мумкин. У 88 кунлик вақтинчалик ҳибсдан кейин бугун, 28 сентябрь куни суд залига олиб чиқилиши кутилмоқда. Бу ҳақда “Sözcü” хабар берди.

Қайд этилишича, жорий йилнинг 3 июлида қўлга олинган ва 28 августда қўйиб юборилиб, яна ҳибсга олинган Дениз Кўктош қарийб бир ойдан сўнг “ниҳоят тоза ҳаводан тўйиб нафас олишни ҳаяжон билан кутаётганини” айтиб ўтган.

“Қуёшни кўришни ва ташқаридаги машина сигналларини эшитишни роса соғиндим,” деган қизиқчи.

Маълумот учун, Дениз Кўктош аҳолисининг асосий қисми мусулмон бўлган Туркияда, халқнинг эътиқоди, муқаддас байрамлари ва одатларини ҳазил остига олиб, мамлакат Жиноят кодексининг 299-моддаси бўйича “президентни ҳақорат қилиш”, шунингдек 216-модданинг 3-қисми бўйича “аҳолининг бир қисми эътиқод қиладиган диний қадриятларни очиқчасига ҳақорат қилиш” айблари қўйилган.

Эслатиб ўтамиз, аввалроқ туркиялик комик Дениз Кўктошга нисбатан Истанбулдаги “Harbiye Cemil Topuzlu” очиқ ҳаво театрида намойиш этган ва кейинчалик YouTube’га жойлаган “Ўлик денгиз” номли стендап дастуридаги сиёсий ҳажвлари сабабли жиноий иш қўзғатилгани ҳақида хабар берилган эди.

Азизбек Ҳамдамов