Эрдўғанни ўлдирмоқчи бўлган шахс қўлга тушди

2016 йил 15 июлдаги давлат тўнтаришига уриниш вақтида Президент Ражаб Тойиб Эрдўғанга суиқасд уюштиришда иштирок этганликда айбланаётган, халқаро қидирувда бўлган Б.К. исмли шахс қўлга олинди. Бу ҳақда Туркия Ички ишлар вазирлиги хабар берди.

Вазирлик маълумотига кўра, Б.К. 2016 йил 15 июлда ФЕТО томонидан амалга оширилган давлат тўнтаришига уриниш чоғида Мармарис шаҳрида Эрдўған яшаган меҳмонхонага суиқасд уюштириш учун юборилган 37 кишилик гуруҳ таркибида бўлган. У собиқ капитан ва ҳарбий вертолёт учувчиси бўлиб, хизматдан четлатилган.

Қайд этилишича, Туркия Бош полиция бошқармасининг Разведка бошқармаси мувофиқлашувида Афёнқараҳисор ва Эскишаҳар полицияси разведка бўлинмалари ҳамда Афёнқараҳисор полициясининг Терроризмга қарши кураш бўлими томонидан олиб борилган қўшма таҳлил ва кузатув ишлари натижасида унинг изига тушилган.

Тергов маълумотларига кўра, Б.К. суиқасд гуруҳининг озодликда юрган сўнгги аъзоси бўлган. У 2026 йил 1 август куни Афёнқараҳисорда ўтказилган махсус операция давомида қўлга олинган.

Вазирликнинг билдиришича, Б.К. га нисбатан “Президентга суиқасд”, “давлат хизмат вазифасини бажараётган шахсни ўлдириш”, “Ҳарбий жиноят кодексини бузиш”, шунингдек, “қурол билан ва бир неча шахс иштирокида тунги пайтда босқинчилик қилиш” айбловлари бўйича қидирув эълон қилинган бўлган.

Эслатиб ўтамиз, аввалроқ Туркияда тақиқланган ва террорчи ташкилот деб эълон қилинган Фатҳуллоҳ Гулен бошчилигидаги ФЕТО ташкилоти 2016 йил июль ойида давлат тўнтаришига уринишдан олдин ва ўша вақтнинг ўзида ҳам Президент Ражаб Тойиб Эрдўғанга бир неча бор суиқасд қилишга ҳаракат қилгани хабар берилганди.