“Дунёдаги энг хунук ит” тармоқ юлдузига айланди

“Дунёдаги энг хунук ит” деб аталган Хуахуа лақабли ит тармоқда машҳур бўлиб кетди. Бу ҳақда Хитой ОАВлари хабар берди.

Бор-йўғи бир ҳафта ичида Хуахуа иштирокидаги қисқа видеороликлар видеоплатформаларда тарқалиб, миллионлаб кўришлар йиғган. Жониворни “хунук жозибадорлиги” учун мақташмоқда ва уни “гўзаллик бўйича охиридан биринчи ўринни эгаллаган ит” деб аташмоқда.

Маҳаллий матбуотнинг аниқлик киритишича, Хуахуанинг ота-онаси – кўргазмали кўринишга эга зоти тоза бордер-колли итлари бўлиб, уядаги бошқа барча итлар ҳам стандарт бўйича чиройли туғилган. Хуахуа эса камёб генетик мутация натижаси бўлган: унинг жуда ҳам бетартиб жунлари ва қулоқларида иккита соч тутамига ўхшаб чиқиб турган патдор жунлари бор.

Ностандарт кўриниши сабабли уни узоқ вақт сота олишмаган, аммо тармоқда тасодифан видео эълон қилинганидан сўнг ит бир зумда интернет юлдузига айланган. Оқибатда кеча, 3 август куни Хуахуани янги эгаси 2400 юань (тахминан 4,3 млн сўм)га сотиб олган.

Эслатиб ўтамиз, аввалроқ Кенияда жойлашган Масаи-Мара миллий қўриқхонасининг ёввойи табиат фотосуратчиси Камбиз Камео Пургханад томонидан олинган жингалак ёлли ноёб шернинг сурати интернетда кенг тарқалганди ва миллионлаб фойдаланувчиларнинг эътиборини тортган эди.