Дугоналари билан қорайиш бўйича рақобатлашган аёл тери саратонидан вафот этди

Англиянинг Манчестер шаҳрида 15 ёшидан дугоналари билан терисини ким кўпроқ қорайтириши бўйича рақобатлашиб, мунтазам солярийга (терини қорайтиришга мўлжалланган ускуна ва жой) қатнаган 30 ёшли Челси Тантум тери саратонидан вафот этди. Бу ҳақда “Daily Mail” хабар берди.

Маълум қилинишича, Челсига 28 ёшида меланома – тери саратонининг хавфли тури ташхиси қўйилган. Ўша пайтда касаллик анча ривожланган ва унинг умуртқа поғонаси, қовурғалари, тос суяги, сон суяклари, ўпкаси, жигари, талоғи ҳамда кўкрак қисмига тарқалиб улгурган.

Шифокорлар дастлаб унга меланоманинг 3C босқичини ташхис қилган. Бироқ 30 ёшга тўлишига бир неча ҳафта қолганида саратон бош миясига ҳам тарқалгани аниқланган. Шундан сўнг, унга касалликнинг 4D босқичи ташхиси қўйилган.

Касаллик оғирлашиб, кундалик ҳаётига жиддий таъсир кўрсатган. Челси бир муддат ногиронлар аравачасидан фойдаланишга ҳам мажбур бўлган. Шунга қарамай, у ҳаётининг сўнгги йилларида бошқаларни солярийнинг хавфи ҳақида огоҳлантириш ва ундан фойдаланиш қоидаларини кучайтириш учун фаол ҳаракат қилган.

Челси, аввалроқ, солярийдан илк бор 15 ёшида фойдалана бошлаганини айтган. Унинг сўзларига кўра, у ва дугоналари кимнинг териси кўпроқ қорайиши бўйича рақобатлашган. У вояга етмаган бўлишига қарамай, солярий салонларига борганида ундан шахсини тасдиқловчи ҳужжат сўралмаган.

Аёл кейинги ўн йил давомида ҳам солярийга мунтазам қатнашда давом этган. Касаллик аниқланганидан сўнг эса у бошқа ёш аёллар ҳам худди шундай ҳолатга тушиб қолмаслиги учун солярий салонларида назоратни кучайтиришга чақирган. Хусусан, 18 ёшга тўлмаганларнинг ушбу хизматдан фойдаланишига йўл қўймаслик мақсадида шахсни тасдиқловчи ҳужжатларни мажбурий текширишни таклиф қилган.

Бундан ташқари, Челси меланома билан касалланган инсонларни қўллаб-қувватлайдиган ва касалликнинг олдини олиш бўйича хабардорликни оширадиган Melanoma Focus хайрия ташкилоти учун 4 минг фунт стерлингдан ортиқ маблағ тўплаган.

Қайд этилишича, Челси жорий йилнинг 30 сентябрь куни вафот этган. Унинг ўлимидан сўнг яқинлари ва дўстлари аёлнинг касаллик билан курашиш давомида ҳам бошқаларга ёрдам беришга интилганини эслаган.

Оила аъзоси Ли Кревен Челсининг сўнгги кунигача курашишдан тўхтамаганини айтган. Унинг таъкидлашича, аёл ўзи бошдан кечирган синовлардан бошқаларни касаллик ҳақида огоҳлантириш учун фойдаланган.

Челсининг яқин дугонаси Клер Луиза эса уни кучли, гўзал, қувноқ, қатъиятли ва унутилмас инсон сифатида таърифлаган. Унинг айтишича, Челси оғир касалликка қарамай, бошқаларга ёрдам бериш ва уларни қўллаб-қувватлаш учун куч топа олган.

“Мен сенинг ҳеч ким бошидан кечирмаслиги керак бўлган азобларни бошдан ўтказганингни кўрдим. Шунга қарамай, ўз тажрибанг орқали бошқаларга ёрдам бериш ва уларни қўллаб-қувватлашга куч топдинг”, деган Клер Луиза.

У, шунингдек, Челси билан ўтган вақтини қадрлашини ва 30 йил унинг ҳаёти учун жуда қисқа бўлганини билдирган.