Доминикан Республикаси “свет”сиз қолди

Кариб денгизидаги 11 миллиондан ортиқ аҳолига эга Доминикан Республикаси кеча, 11 ноябрь куни йирик электр узилиши – блэкаутни бошдан кечирди. Бу ҳақда “Empresa de Transmisión Eléctrica Dominicana” хабар берди.

Мамлакат расмийларига кўра, ҳодисага электр узатиш тизимидаги авария сабаб бўлган.

Биринчи бўлиб Сан-Педро-де-Макорис шаҳридаги электр станция ишламай қолган, бу эса бошқа станциялар ва подстанцияларнинг занжирли ўчишига олиб келган. Ҳозирча аварияга айнан нима сабаб бўлгани номаълум.

Блекаут пойтахт Санто-Доминго ва машҳур туристик шаҳар Пунта-Канани энг кўп зарарлаган. Шу билан бирга, ижтимоий тармоқларда мамлакатнинг бошқа ҳудудларида ҳам электр узилиши ҳақида хабарлар тарқалган. 

Электр таъминотининг тўхташи жамоат транспорти, жумладан, метрополитен ва канат йўллари ишига жиддий таъсир кўрсатган. Шифохоналар, банклар ва йирик муассасалар генераторлар ёрдамида ишлашга ўтган, бироқ кўплаб уй хўжаликлари ва кичик бизнеслар электрсиз қолган.
Кечга бориб, электр таъминоти аста-секин тиклана бошлаган. 

Эслатиб ўтамиз, аввалроқ Чехияда йирик миқёсдаги электр таъминоти узилиши – блэкаут содир бўлганди.