“Дельфин” сабабли Пекинда оммавий эвакуация бошланди

“Дельфин” тайфуни сабабли Пекинда оммавий эвакуация эълон қилинди. Синоптиклар Хитой пойтахтига рекорд даражада ёғингарчилик ёғишини прогноз қилишмоқда. Бу ҳақда “The Guardian” хабар берди.

Қайд этилишича, Пекинда минглаб одамлар сув тошқини ва кўчки хавфи юқори бўлган ҳудудлардан эвакуация қилинган. Чунки “Дельфин” тайфуни сабабли Хитойнинг шимолий ва марказий қисмларида кучли жала қуймоқда.

Синоптиклар яқин 24 соат ичида Хитой пойтахтига 150 миллиметрдан ортиқ ёғингарчилик ёғиши мумкинлигидан огоҳлантирди, баъзи ҳудудларда эса 200 миллиметрдан ортиқ ёғиши прогнози қилинмоқда. Бу Пекиннинг йиллик ўртача ёғингарчилик миқдорининг (528 мм) учдан бир қисмидан кўпроғини ташкил этади.

Бугун, 12 август куни Пекинда жала ёғингарчилиги бўйича хавфнинг иккинчи даражаси ҳисобланган “заъфарон” огоҳлантириш эълон қилинган.

Хабар қилинишича, “Дельфин” тайфуни Чжэцзян провинциясидаги қишлоқлар ва қишлоқ хўжалиги экин майдонларини сув остида қолдирган.

Пекин ҳокимияти юзлаб сайёҳлик масканлари ва кемпингларни ёпган, 1300 дан ортиқ сайёҳлар эвакуация қилинган ёки уларнинг шаҳарга кириши тақиқланган.

Бундан ташқари, 5 мингга яқин кекса ёшли инсонлар қариялар уйларидан кўчирилган, тоғли ёки сув бўйи ҳудудларидаги қурилиш майдончалари яқинида яшовчи 1800 га яқин киши ҳам эвакуация қилинган.

Эслатиб ўтамиз, аввалроқ “Дельфин” тайфуни Хитойнинг шарқий қирғоқларига етиб келгани – офат аҳоли зич жойлашган ҳудудларга ёпирилгани ҳақида метеорология хизмати маълум қилган эди.