Cовет айғоқчисининг невараси Франция президенти бўлмоқчи

Европарламент депутати ва “Жамоатчилик майдони” (Place Publique) сўл марказчи партияси етакчиси Рафаэль Глюксманн Франция президентлигига ўз номзодини қўйишини эълон қилди. Бу ҳақда у кеча, 23 август куни TF1 телеканали эфирида сўз очди.

У Социалистик партия ва “Жамоатчилик майдони” томонидан ташкил этиладиган праймеризда иштирок этишга ҳамда тарқоқ сўл электоратни бирлаштиришга ҳаракат қилишни ният қилган. Глюксманн мўътадил сўл кучларнинг ягона номзодига айланишни ва сўл радикал Жан-Люк Меланшонга ҳамда сўровномаларда етакчилик қилаётган ўнг радикал Марин Ле Пенга рақобат туғдиришни режалаштирмоқда.

“Мен номзодимни қўйяпман, чунки Францияни оёққа турғизишни хоҳлайман. Мамлакатимиз нимага айланаётганини кўрганимизда ҳаммамизнинг юрагимиз оғрийди. Биз ушбу сайловларда ғалаба қозонишимиз ва французлар ҳаётини ўзгартиришимиз мумкин”, дейди у.

Мўътадил сўлларнинг ягона номзодига айланиш учун Глюксманн Социалистик партиянинг праймеризида иштирок этмоқчи. У ерда у бир қатор машҳур француз сиёсатчилари билан рақобатлашишига тўғри келиши мумкин. Эҳтимолий даъвогарлар орасида депутат Филипп Брюн, собиқ экология вазири Сеголен Руаяль, собиқ президент Франсуа Олланд ва социалистлар етакчиси Оливье Фор тилга олинмоқда.

2024 йилги парламент сайловларида Глюксманн ва бошқа сўл кучлар Жан-Люк Меланшоннинг “Эгилмас Франция” сўл радикал партияси билан “Янги халқ фронти” блогига бирлашиб, биринчи ўринни эгаллаган. Бу сафар бундай иттифоқ кутилмаяпти: Меланшон социалистларнинг праймеризида иштирок этишдан бош тортган ва мустақил равишда номзодини қўймоқчи. Глюксманн, ўз навбатида, “Меланшон билан бошқа ҳеч қандай келишувлар бўлмаслигига” ваъда берган.

“Bloomberg”нинг қайд этишича, “Экологлар” сўл марказчи партияси ҳозирда иккала лагерь билан ҳам музокаралар олиб бормоқда. Шу тариқа, Франциядаги сўл электорат парчаланганлигича қолмоқда.

Сўровномаларга кўра, Марин Ле Пен (“Миллий бирлашиш”) ҳозирча биринчи турнинг фаворити бўлиб турибди. “Reuters”га кўра, унинг рақибларидан ҳеч бири биринчи турда ҳатто 18 фоиз овоз йиға олмаяпти, тўртинчи маротаба Елисей саройига даъвогарлик қилаётган Ле Пеннинг рейтинги эса 36 фоиз атрофини ташкил этмоқда. Сўровномалар, шунингдек, бир қатор сценарийларда унинг иккинчи турдаги ғалабасини кўрсатмоқда.

“Euronews” маълумотларига кўра, Глюксманн 10–12 фоиз овозга умид қилиши мумкин. “OpinionWay” томонидан ўтказилган июнь сўровномаси бироз юқорироқ натижани кўрсатган: Глюксманн 14 фоиз овоз тўплаган – бу собиқ бош вазир Габриэль Атталь билан бир хил ва 13 фоиз тўплаган Меланшондан бироз олдинда. Ле Пен эса 35 фоиз олган. Глюксманн, шунингдек, 2024 йилги Европарламентга сайловларда эришган натижасига таяниши мумкин: у бошчилик қилган социалистлар ва “Жамоатчилик майдони” 13,8 фоиз овоз олган.

Маълумот учун, Глюксманн Украинанинг изчил тарафдори сифатида танилган. 2009-2013 йилларда у Грузиянинг ўша пайтдаги президенти Михаил Саакашвилининг маслаҳатчиси бўлиб ишлаган. У француз файласуфи Андре Глюксманннинг ўғли. “The Telegraph” нашрининг ёзишича, унинг бобоси Рубин Глюксманн совет разведкачиси бўлган.

Францияда президентлик сайловларининг биринчи тури 2027 йил 18 апрелга, иккинчи тури эса 2 майга белгиланган.