Бухорода “закладчик” 843 млн сўмлик “спайс” билан ушланди (видео)

Бухорода 843 миллион сўмлик “спайс” мусодара қилинди. 602,7 грамм синтетик гиёҳвандлик воситасини Telegram орқали тарқатган “закладчик” уни Навоий, Самарқанд ва Жиззах вилоятларига етказиб бериш билан шуғулланган. Бу ҳақда Ички ишлар вазирлиги хабар берди.

Қайд этилишича, жорий йилнинг 8 август куни Бухоро шаҳрининг Ғиждувон кўчасида шубҳали хатти-ҳаракатлари билан эътибор тортган фуқаро тўхтатилиб, холислар иштирокида кўздан кечирилган. Унинг ёнидан сотиш мақсадида сақланаётган, экспертиза хулосасига кўра, 2,7 грамм “спайс” синтетик гиёҳвандлик моддаси топилган.

Суриштирув давомида фуқаро ушбу моддани танишидан олгани аниқланган. Шу куни ўтказилган тезкор тадбирда унинг шериги 1,5 миллион сўм эвазига “Альфа-ПВП” ва “спайс” сотаётган вақтида ашёвий далиллар билан қўлга олинган.

Шунингдек, тезкор тадбирлар давомида жорий йилнинг 11 август куни Бухоро туманининг Ромитан маҳалласида Cobalt автомобили тўхтатилиб, текширилганда унинг йўловчи ўриндиғи остидан 77 та пакетга қадоқланган 457,1 грамм “спайс” топилган. Бундан ташқари, ушланган шахснинг кўрсатмаси асосида ҳудуддаги хилват жойлардан яна 29 та пакетга яширилган 144,9 грамм гиёҳвандлик воситаси олиб қўйилган.

Аниқланишича, мазкур шахс Telegram мессенжеридаги махсус бот орқали “закладчик” сифатида фаолият юритган. У жами 602,7 грамм гиёҳвандлик воситасини Навоий, Самарқанд ва Жиззах вилоятларига етказиб беришни режалаштирган.

Ҳолат юзасидан ушланган шахсларга нисбатан Жиноят кодексининг 273-моддаси (гиёҳвандлик воситаларини, психотроп моддаларни ёки уларнинг аналогларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.

Эслатиб ўтамиз, аввалроқ Андижон вилоятининг Избоскан туманида 11 кг 700 гр “марихуана”ни 6 миллион сўмга сотмоқчи бўлган шахс ушлангани ҳақида хабар берилган эди.