Қабристонда қарийб 12 кг “марихуана”ни сотмоқчи бўлган шахс ушланди (видео)

Андижон вилоятининг Избоскан туманида 11 кг 700 гр “марихуана”ни 6 миллион сўмга сотмоқчи бўлган шахс ушланди. Бу ҳақда вилоят Ички ишлар бошқармаси маълум қилди.

Қайд этилишича, Андижон вилояти ИИБ тезкор-қидирув хизмати ходимлари томонидан Избоскан туманида ўтказилган тезкор тадбирда 1989 йилда туғилган шахс туман ҳудудидаги қабристонлардан бирида соф оғирлиги 11 килодан ортиқ марихуана гиёҳвандлик моддасини 6 миллион сўм эвазига сотаётган вақтида ашёвий далиллар билан ушланган.

Тезкор суриштирувлар давомида гумонланувчи гиёҳвандлик моддасини фақат шахсий учрашувлар орқали эмас, балки замонавий ахборот-коммуникация воситалари ёрдамида ҳам тарқатишга урингани аниқланган.

Хусусан, у ижтимоий тармоқлар орқали эҳтимолий мижозларига марихуанани сотиш мақсадида бир қатор видео хабарлар юбориб келган.

Мазкур ҳолат юзасидан Жиноят кодексининг 273-моддаси (гиёҳвандлик воситаларини, психотроп моддаларни ёки уларнинг аналогларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 6-қисми “а” банди билан жиноят иши қўзғатилган. Ҳозирда тергов ҳаракатлари олиб борилмоқда.

Эслатиб ўтамиз, аввалроқ Тошкент ва Фарғонада ўтказилган тезкор тадбирлар давомида наркотик моддаларни яшириш ва ташиш билан боғлиқ ҳолатлар фош этилгани ҳақида хабар берилган эди.