“Борингизга шукур!” Пашинян ҳам Трампга қўнғироқ қилди

Арманистон Бош вазири Никол Пашинян ва АҚШ Президенти Дональд Трамп кеча, 9 август куни телефон орқали суҳбат қилди. Унда Бош вазир Вашингтон саммити Ереван ҳамда Баку ўртасида ҳақиқий тинчликка эришишга йўл очганини айтди. Бу ҳақда Арманистон Ҳукумати матбуот хизмати хабар берди.

“Пашинян Трампга 2025 йил 8 август куни Вашингтонда, Оқ уйда Тинчлик саммитини ташкил этгани ҳамда Арманистон ва Озарбайжон раҳбарлари томонидан қабул қилинган Тинчлик декларациясини гувоҳ сифатида имзолагани учун миннатдорлик билдирди. Шунингдек, у тинчлик ўрнатиш ишида Президент Трампнинг шахсий саъй-ҳаракатлари ҳал қилувчи аҳамият касб этганини таъкидлади”, дейилади хабарда.

Бундан ташқари, Пашинян ва Трамп яқин келажакда “Халқаро тинчлик ва фаровонлик учун Трамп йўналиши” лойиҳаси бўйича қурилиш ишларини бошлашга қатъий қарор қилганликларини тасдиқлади.

2025 йил 8 август куни Вашингтонда АҚШ Президенти Доналд Трамп билан бўлиб ўтган уч томонлама учрашув якунларига кўра, Арманистон Бош вазири Никол Пашинян ва Озарбайжон Президенти Илҳом Алиев Баку ва Ереван ўртасида тинч йўл билан келишувга эришиш ҳамда Озарбайжоннинг асосий қисми билан Нахичеван ўртасида транспорт коммуникацияларини яратиш тўғрисидаги қўшма декларацияни имзолади. Мазкур лойиҳа “Халқаро тинчлик ва фаровонлик учун Трамп йўналиши” деб номланди.

Бироқ, Россия Федерацияси Бош вазири ўринбосари Алексей Оверчук ТАСС агентлигига берган интервьюсида “Трамп йўналиши” лойиҳасини амалга ошириш бўйича келишувнинг имзоланиши Жанубий Кавказдаги минтақавий мувозанатни бузганини маълум қилганди. 

Эслатиб ўтамиз, жорий йилнинг 8 август куни Озарбайжон Президенти Илҳом Алиев ҳам АҚШ давлат раҳбари Дональд Трамп билан телефон орқали мулоқот қилган эди. 7 август куни эса Ўзбекистон Президент Шавкат Мирзиёев ва Трамп ўртасида мулоқот ўтказилганди.