Болгарияда даҳшатли ЙТҲ: 86 та автомобиль тўқнашди, 12 киши ҳалок бўлди (видео)

Бугун, 10 ноябрь куни эрталаб Болгариянинг “Тракия” автомагистралида, Ямбол яқинида иккита оммавий йўл-транспорт ҳодисаси юз берди. Ҳодиса оқибатида 12 киши ҳалок бўлди, ўнлаб одамлар жароҳатланди. Бу ҳақда мамлакат Соғлиқни сақлаш вазири Катя Ивковага таяниб “24 часа” нашри хабар қилди. 

Унинг сўзларига кўра, ўн киши воқеа жойида ҳалок бўлган, яна икки киши шифохонада вафот этган. Тиббиёт муассасаларига жами 46 нафар жароҳатланганлар етказилган. Бир неча киши реанимацияда қолмоқда.

Биринчи тўқнашув маҳаллий вақт билан соат 7:10 атрофида трассанинг Бургас йўналишидаги қисмида юз берган. Кўп ўтмай, автомагистралнинг қарама-қарши томонида – мамлакат пойтахти София йўналишида ҳам автомобиллар тўқнаша бошлаган. Ҳудудда қоронғи ва қалин туман бўлган.

Болгариянинг “Сега” нашри маълумотларига кўра, аварияларда 86 та транспорт воситаси, жумладан, енгил машиналар, микроавтобуслар ва оғир юк машиналари иштирок этган.

Одамларнинг бир қисми шикастланган автомобиллар ичида қисилиб қолган. Уларга етиб бориш учун қутқарувчиларга йўл тўсиқларининг бир қисмини демонтаж қилишга тўғри келган. Операцияга қўшни вилоятларнинг фавқулодда хизматлари ва ҳарбийлар жалб этилган.

Магистраль иккала йўналишда ҳам ёпилган, транспорт воситалари айланма йўлларга йўналтирилган. Оғир ярадорларни София шифохоналарига етказиш учун ҳарбий ва ҳукумат самолётлари тайёрланган.

Авариянинг дастлабки омиллари сифатида кўриш даражасининг кескин ёмонлашиши, нам йўл ва ҳаракатланиш шароитига мос келмайдиган тезлик айтилмоқда. Якуний сабаблар аниқланмоқда.