Бензема “Ал-Ҳилол”ни тарк этди

Франциялик ҳужумчи Карим Бензема Саудия Арабистонининг “Ал-Ҳилол” футбол клубини тарк этди. Бу ҳақда клуб матбуот хизмати маълум қилди.

Томонлар мавсум охиригача амал қилган шартномани ўзаро келишув асосида бекор қилишга қарор қилди. Испаниянинг As газетаси хабарига кўра, футболчи аллақачон бошқа клублардан бир нечта таклиф олган ва профессионал фаолиятини якунлаш ниятида эмас.

Маълумот учун, 38 ёшли Бензема февраль ойида “Ал-Ҳилол” сафига қўшилган эди. У ўтган мавсумда жамоа билан Саудия Арабистони Қироллик кубогини қўлга киритди.

Бунгача, 2023 йил ёзидан бери франциялик футболчи “Ал-Иттиҳод” сафида тўп тепиб, у ерда Саудия Арабистони чемпионати ва мамлакат кубоги ғолибига айланган.

Саудия Арабистонига кўчиб ўтишидан олдин Бензема “Реал Мадрид” ва “Лион” жамоаларида фаолият олиб борган.

Ҳужумчи “Реал Мадрид” билан беш марта Чемпионлар лигаси ва Клублар ўртасидаги жаҳон чемпионати, тўрт марта Испания чемпионати, шунингдек, Испания Суперкубоги, UEFA Суперкубоги ҳамда уч марта Испания Кубогини қўлга киритган.

“Лион” сафида эса у тўрт марта Франция чемпионати, икки марта Франция Суперкубоги ва бир марта Франция Кубогида ғолиб чиққан.

Бензема 2022 йилда Франциянинг “France Football” журнали томонидан дунёнинг энг яхши футболчисига топшириладиган “Олтин тўп” соҳиби бўлган.

Франциялик ҳужумчи “Реал Мадрид” сафида жами 648 та учрашувда майдонга тушиб, 354 та гол урган ва клуб тарихидаги иккинчи энг яхши тўпурарга айланган.