“Барселона” яна “Камп Ноу”ни тарк этади – ОАВ

Испаниянинг “Барселона” клуби “Камп Ноу” стадионида олиб борилаётган таъмирлаш ишлари сабабли 2027-2028 йилги мавсумни Олимпия стадионида бошлайди. Бу ҳақда ESPN хабар берди.

Бир неча кун олдин “Барселона” “Камп Ноу”ни таъмирлаш лойиҳасини якунлаш учун қўшимча 510 миллион евро маблағ ажратишни маъқуллаган эди. Клуб стадионни реконструкция қилиш доирасида том ўрнатилиши режалаштирилаётгани сабабли 2027-2028 йилги мавсум бошланишидан олдин асосий аренани бўшатиши керак бўлади.

Қайд этилишича, амалдаги Испания чемпиони 2028 йилги қишки танаффусдан сўнг “Камп Ноу”га қайтиши кутилмоқда.

Айни вақтда стадионнинг сиғими тахминан 62 минг томошабин билан чекланган. “Барселона” 2028 йилда “Камп Ноу”га қайтганида арена сиғими 95 минг кишига етказилиши, 2028-2029 йилги мавсум бошланишига келиб эса бу кўрсаткич 105 минг нафарга оширилиши режалаштирилган.

Эслатиб ўтамиз, жорий йилнинг 15 сентябрь куни Европа футбол иттифоқи (UEFA) 2029 йилги Чемпионлар лигаси финали “Камп Ноу” стадионида ўтказилишини маълум қилган эди.