Балида россиялик сайёҳлар бўлган катер портлаб, ёнғин чиқди (видео)

Индонезиянинг Бали ороли яқинида россиялик тўрт сайёҳ бўлган катерда портлаш содир бўлиб, ёнғин чиқди. Бу ҳақда “Gazeta.ru” хабар берди.

Қайд этилишича, ҳодиса жорий йилнинг 29 октябрь куни Нуса-Пенида ороли яқинидаги “Gamat Bay” кўрфазида юз берган. “Naomi” номли катерда тўрт нафар россиялик сайёҳ, гид ва экипаж аъзолари бўлган. Улар денгизда ниқоб ва трубка ёрдамида сузиш – снорклинг экскурсиясига чиққан.

Тахминан соат 13:40 да катер кўрфаздан чиқишга ҳозирлик кўраётган пайтда унинг аккумулятор жойлашган қисмида портлаш юз берган. Шундан сўнг, кемада ёнғин бошланган. Оловни кўрган сайёҳлар ва гид сувга сакраган.

Тахминан 70 дақиқадан сўнг, соат 14:50 да воқеа жойидан ўтаётган бошқа катердагилар сувдаги одамларни кўриб қолган. Улар сайёҳлар ва Naomi катери экипажини қутқариб, кемасига олиб чиққан.

Ҳодиса оқибатида сайёҳлар ва гид жабрланмаган. Бироқ катер капитани — 31 ёшли И Кадек Двияна оёқларидан куйган. У Нуса-Пенида оролидаги Gema Santhi шифохонасига етказилган.

Бали полицияси вакили Рина Исриана Деви ёнғин оқибатида ҳеч ким ҳалок бўлмаганини тасдиқлаган. Расмий хабарларда сайёҳларнинг фуқаролиги кўрсатилмаган, уларнинг россиялик экани ҳақида “Gazeta.ru” нашри хабар берган.

Полиция маълумотига кўра, “Naomi” катери экскурсиядан аввал таъмирланган ва режали техник кўрикдан ўтказилган. Шунингдек, денгизга чиқишдан олдин ҳам текширилган. Гиднинг айтишича, кўрик вақтида носозлик аниқланмаган.

Ҳозирда Нуса-Пенида полицияси ёнғин сабабларини ўрганмоқда. Ҳуқуқ-тартибот идоралари гувоҳларни сўроқ қилишни бошлаган. Катер эгаси эса жабрланган капитанга шифохонада ёрдам берганидан сўнг полицияга ариза билан мурожаат қилмоқчи.

Ҳодисадан сўнг полиция денгиз экскурсияларини ташкил этувчиларни катерлар ва улардаги хавфсизлик воситаларининг техник ҳолатини мунтазам текшириб боришга чақирган.