АҚШда ўрмон ёнғинини ўчираётган вертолёт ҳалокатга учради (видео)

АҚШнинг Юта штатида ўрмон ёнғинини ўчириш ишларида қатнашаётган вертолёт ҳалокатга учради. Ҳодиса оқибатида бортдаги икки экипаж аъзоси бедарак йўқолди. Бу ҳақда “The Guardian” хабар берди.

Қайд этилишича, кучли ёнғин ва мураккаб рельеф сабабли қутқарувчилар ҳозирча вертолёт қолдиқларига етиб бора олмаяпти.

Маълумотларга кўра, Sikorsky S-64 русумли оғир юк кўтарувчи вертолёт Fishlake миллий ўрмонидаги Widemouth 2 ёнғинини ўчиришда иштирок этаётган бўлган. Ҳалокатдан олти соатдан кўпроқ вақт ўтганига қарамай, ҳудуддаги фаол ёнғин қутқарув ишларини бошлашга имкон бермаяпти.

Маҳаллий шериф идорасининг маълумотига кўра, терговчилар ва қутқарув гуруҳлари ҳудудга хавфсиз кириш имконини аниқлаш учун ёнғинни бошқариш гуруҳи билан ҳамкорлик қилмоқда. Экипаж аъзоларининг тақдири ҳозирча номаълум.

Widemouth 2 ёнғини жорий йилнинг 27 июль куни чақмоқ уриши оқибатида бошланган. Кеча, 7 август кунги ҳолатга кўра, ёнғин 105 минг акрдан ортиқ майдонни қамраб олган ва камида 6 та иншоотни вайрон қилган. Ёнғиннинг 19 фоизи назоратга олинган.

Ушбу ёнғин Юта штатида жорий мавсумда қайд этилган иккинчи энг йирик ўрмон ёнғинига айланган. Штат губернатори Спенсер Кокс ўт ўчириш ишларининг хавфли эканини таъкидлаб, бедарак йўқолган экипаж аъзолари учун фуқаролардан дуо қилишни сўраган.

Эслатиб ўтамиз, аввалроқ Туркиянинг Муғла, Анталия, Баликесир ва Чаноққалъа вилоятларида бир вақтнинг ўзида юзага келган ўрмон ёнғинлари туфайли автомобиль йўллари ёпилгани, шифохона, қариялар уйи ва юзлаб фуқаролар эвакуация қилингани ҳақида хабар берилган эди. Шунингдек, Туркиянинг 9 вилоятида юзага келган ўрмон ёнғинларини ўчириш ишларига 3 514 нафар ходим, 23 та самолёт, 54 та вертолёт ва 1 035 та махсус техника жалб этилгани ҳам хабар қилинганди.