Туркиянинг 9 вилоятида ўрмон ёнғинлари авж олди (фоторепортаж)

Туркиянинг 9 вилоятида юзага келган ўрмон ёнғинларини ўчириш ишларига 3 514 нафар ходим, 23 та самолёт, 54 та вертолёт ва 1 035 та махсус техника жалб этилди. Бу ҳақда “A Haber” хабар берди.

Қайд этилишича, энг мураккаб вазият Муғла, Анталия, Баликесир ва Измир вилоятларида кузатилмоқда. Муғланинг Сейдикемер туманида кучли шамол таъсирида кенг ҳудудга тарқалган ёнғин сабаб 408 та уй эҳтиёт чораси сифатида эвакуация қилинган. Шунингдек, Сейдикемер давлат шифохонасидаги 45 нафар бемор яқин атрофдаги шифохоналарга кўчирилган.

Ёнғинни ўчириш ишларига 25 та ҳаво техникаси, 410 та қуруқлик техникаси ва 1 141 нафар ходим жалб этилган. Анталия вилоятининг Кумлужа ва Қаш туманларида ҳам ёнғинларга қарши кураш давом этмоқда. Кумлужада олов аҳоли яшаш жойларига яқинлашгани сабаб 50 та уй эҳтиёт чораси сифатида бўшатилган.

Шу билан бирга, Баликесирнинг Эдремит–Олтинолук ва Гёмеч туманлари, шунингдек, Измир вилоятидаги ёнғинларни ўчириш ишлари ҳам давом этмоқда. Туркия Қишлоқ ва ўрмон хўжалиги вазири Иброҳим Юмаклининг маълум қилишича, Чаноққалъа, Ялова, Ойдин, Кутаҳя ва Маниса вилоятларидаги ёнғинлар назорат остига олинган.

“Кечадан буён мамлакатимиз бўйлаб юз берган 115 та ёнғинга қарши кураш олиб бормоқдамиз. Шундан 69 таси ўрмон ҳудудларидан ташқарида юз берди. Кеча асосан назорат остига олинганини маълум қилганимиз Баликесирнинг Эдремит, Чаноққалъанинг Айважик ва Анталиянинг Кумлужа туманларидаги ёнғинлар энди тўлиқ назорат остига олинди“, дейди Юмакли.

Эслатиб ўтамиз, аввалроқ Туркиянинг Муғла, Анталия, Баликесир ва Чаноққалъа вилоятларида бир вақтнинг ўзида юзага келган ўрмон ёнғинлари сабаб автомобиль йўллари ёпилгани, шифохона, қариялар уйи ва юзлаб фуқаролар эвакуация қилингани ҳақида хабар берилган эди.