АҚШда ўлим эпидемиясининг тарқалиш ҳудуди кенгайди

АҚШ соғлиқни сақлаш идоралари Мексиканинг марказий ҳудудидан етказиб берилган айсберг салати билан боғлиқ циклоспороз эпидемияси юзасидан олиб борилаётган текширувни яна кенгайтирди. Эндиликда касаллик билан боғлиқ штатлар сони 15 тага етди. Бу ҳақда “Reuters“ хабар берди.

Қайд этилишича, текширув доирасига яна Миссури, Арканзас, Айова, Небраска, Нью-Хэмпшир ва Шимолий Каролина штатлари киритилган.

АҚШ Касалликларни назорат қилиш ва олдини олиш маркази ҳамда Озиқ-овқат ва дори воситалари бошқармаси маълумотига кўра, ушбу кўп штатли эпидемия билан боғлиқ 6 358 та касалланиш ҳолати қайд этилган. Шундан 278 нафари шифохонага ётқизилган. Идоралар касалликнинг манбаи фақат айсберг салати билан чекланмаслиги мумкинлигини ҳам ўрганмоқда.Дастлаб эпидемия 5 штатда Taco Bell ресторанларида истеъмол қилинган салат билан боғланган. Кейинчалик салат Мексиканинг марказий қисмидаги Taylor Farms корхонасидан етказиб берилгани аниқланган. Жорий йилнинг 24 июль куни текширув қамрови 9 штатга кенгайтирилган.

Циклоспороз одатда нажас билан ифлосланган сув ёки хом мева-сабзавотларни истеъмол қилиш орқали юқади. Касаллик диарея, кўнгил айниши ва бошқа ошқозон-ичак билан боғлиқ аломатларни келтириб чиқаради.

Эпидемиянинг энг оғир оқибатлари Мичиган штатида кузатилмоқда. Шунингдек, Буюк Британиядан Кинтана-Роода дам олиб қайтган сайёҳларда циклоспороз аниқлангач, Мексика Соғлиқни сақлаш вазирлиги мазкур ҳудудда ҳам текширув бошлаган.

Эпидемия фонида АҚШда салат хариди ва айрим ресторанларга ташрифлар камайгани айтилмоқда. Хусусан, Salad and Go ресторанлар тармоғи банкротлик ҳақида ариза бериб, бунга циклоспороз тарқалиши ҳам таъсир кўрсатган омиллардан бири бўлганини билдирган.

Эслатиб ўтамиз, аввалроқ АҚШда Cyclospora паразити келтириб чиқарган циклоспороз касаллиги тарқалиши даврида илк бор 2 киши вафот этгани ҳақида хабар берилган эди. Вафот этган икки беморнинг соғлиғида бошқа оғир муаммолари ҳам бўлган.