АҚШда Трамп сурати туширилган 1 долларлик танга чиқарилди

АҚШ зарбхонаси Президент Дональд Трамп сурати туширилган бир долларлик тангани муомалага чиқарди ва уни сотишни бошлади. Бу ҳақда “Al Jazeera” хабар берди.

Қайд этилишича, танга АҚШ Мустақиллик декларацияси қабул қилинганининг 250 йиллиги муносабати билан чиқарилган. Олтинранг танганинг бир томонида Трампнинг портрети, “LIBERTY” ва “IN GOD WE TRUST” ёзувлари жойлаштирилган.

Танганинг орқа томонида АҚШ президентлик муҳри тасвири ва қалқонда “250” рақами акс этган. АҚШ зарбхонаси танга мамлакатнинг юбилейи арафасидаги “руҳ, ғурур ва мерос”ни ифодалашини билдирган.

Маълум қилинишича, Трамп сурати туширилган танганинг чиқарилиши мамлакатда танқидларга ҳам сабаб бўлган. Чунки АҚШда амалдаги президентларнинг суратини валютага жойлаштириш узоқ вақтдан бери анъанага зид ҳисобланиб келган.

Бундай ҳолатга тарихдаги энг яқин мисол 1926 йилда кузатилган. АҚШнинг 150 йиллиги муносабати билан чиқарилган тангада ўша пайтда президент лавозимида бўлган Калвин Кулиж ва биринчи президент Жорж Вашингтоннинг ёнма-ён портретлари акс этган.

Бироқ танқидчилар 1926 йилги танга оддий муомала воситаси эмас, балки юбилей муносабати билан чиқарилган эсдалик тангаси бўлганини таъкидламоқда.

Тангани чиқариш ғоясини АҚШ Молия вазири Скотт Бессент 15 июль куни ижтимоий тармоқда эълон қилган. Унинг айтишича, танга “Америка қадриятларининг кучини” ва эркинликни асрашга бағишланган мамлакат ваъдасини ифодалайди.

Трамп маъмурияти президентнинг номи ёки суратини бошқа объект ва маҳсулотларда ҳам акс эттириш ташаббусларини илгари сурган. Улар орасида Кеннеди маркази, АҚШ Тинчлик институти, миллий боғлар учун абонементлар ва 250 йиллик юбилейга бағишланган чекланган сериядаги паспортлар бор.

Шунингдек, май ойида Бессент Трамп сурати туширилган янги 250 долларлик банкнотини чиқариш бўйича тайёргарлик бошланганини маълум қилган. Бу ташаббусни амалга ошириш учун Конгресс розилиги талаб этилади.

Бир долларлик танганинг номинал қиймати бир доллар бўлса-да, АҚШ зарбхонаси уни коллекционерларга устама нархда сотмоқда. 25 донадан иборат ўрам 61 доллар, 100 доналик халта эса 154,50 доллардан таклиф этилган.

АҚШ зарбхонаси тангалар фақат безак ёки коллекция учун эмас, балки расмий муомала воситаси сифатида ҳам ишлатилиши мумкинлигини таъкидлаган.

Эслатиб ўтамиз, аввалроқ АҚШ Президенти Дональд Трамп Америка мустақиллигининг 250 йиллиги муносабати билан чиқариладиган янги паспорт дизайнини тақдим этганди.