Трамп ўз сурати туширилган янги АҚШ паспортининг расмини эълон қилди

АҚШ Президенти Дональд Трамп Америка мустақиллигининг 250 йиллиги муносабати билан чиқариладиган янги паспорт дизайнини тақдим этди. Мазкур паспорт чекланган нусхада эсдалик сифатида чиқарилади ва унда Трампнинг сурати акс эттирилган. Бу ҳақда CNN хабар берди.

“АҚШнинг янги паспорти. Унда: “Хуш келибсиз, аммо одобли бўлинг!” деб ёзилган”, дея Трамп Truth Social ижтимоий тармоғидаги саҳифасида ёзиб қолдирган.

У эълон қилган намунавий паспорт саҳифасида Трампнинг Resolute иш столи ортида тасвирланган сурати, фонида эса Мустақиллик декларациясининг асл матни ва пастки қисмида унинг имзоси жойлаштирилган. Қарама-қарши саҳифада рассом Жон Трамбуллнинг “Мустақиллик декларацияси” картинаси акс этган.

“Американинг 250 йиллигига бағишланган янги АҚШ паспорти”, дея Оқ уй ҳам X ижтимоий тармоғидаги расмий саҳифасида айни шу паспорт тасвирини эълон қилган.

Бироқ Давлат департаменти ушбу тасвир эсдалик паспортининг якуний расмий дизайни эканига ҳозирча изоҳ бермаган. Мазкур паспорт илк бор апрель ойида АҚШнинг 250 йиллик юбилейини нишонлаш дастури доирасида эълон қилинган эди.

Расмийларга кўра, у тайёр бўлгач, Вашингтон паспорт агентлигида ҳужжатини шахсан янгилаётган фуқаролар учун стандарт паспорт сифатида берилади. Онлайн мурожаатлар ва бошқа ҳудудлардаги паспорт марказларида эса амалдаги дизайн сақланиб қолади.

Эслатиб ўтамиз, аввалроқ АҚШ Молия вазири Скотт Бессент Президент Дональд Трамп сурати туширилган 250 долларлик янги банкнота тайёрланаётганини тасдиқлаган эди.