АҚШ Венесуэладаги нефть конларини 100 йилга ижарага олмоқчи

Венесуэла АҚШ билан йирик нефть конларини 100 йилгача ижарага бериш бўйича музокара олиб бормоқда. Бу ҳақда “Bloomberg” хабар берди.

Нашрнинг ёзишича, АҚШ ва Венесуэла ўртасида келишувга эришиш жараёни якунига яқинлашган. Бироқ бу Венесуэладаги барча нефть конлари ҳақида эмас. Дастлабки таклифга кўра, қарийб 10 та кон АҚШ назоратига ўтиши мумкин. Ушбу конларда жами 90 миллиард баррелга яқин нефть захираси мавжуд.

Манбаларга кўра, мазкур конларнинг айримлари аввал Венесуэла президенти Николас Мадурога яқин шахслар томонидан назорат қилинган ёки Хитой компаниялари билан боғлиқ бўлган. Ҳозирча музокаралар якунланмаган. Таклиф қилинаётган шартлар ўзгариши ёки умуман бошқа кўринишга келиши мумкин.

Агар келишув амалга ошса, бу АҚШнинг бошқа давлат иқтисодиётига аралашувининг мисли кўрилмаган шаклларидан бири бўлиши мумкин. Шу билан бирга, ташаббус АҚШ Президенти Дональд Трамп маъмуриятининг Ғарбий яримшарда АҚШ таъсирини кенгайтиришга қаратилган сиёсатига мос келади.

Маълумотларга кўра, жорий йилнинг январь ойида Николас Мадуро АҚШ махсус кучлари томонидан қўлга олинганидан сўнг, Вашингтон ва Венесуэланинг янги ҳукумати ўртасида табиий ресурслардан фойдаланиш имконини берувчи бир қатор келишувлар тузилган.

Май ойида АҚШ Венесуэладаги RV-1 тадқиқот реакторида ишлаб чиқарилган бойитилган ураннинг барчасини мамлакатдан олиб чиққани маълум бўлган. Шунингдек, Трамп Венесуэланинг янги ҳукуматини олтин ва бошқа фойдали қазилмаларни сотишга кўмаклашиш бўйича келишув эвазига тан олишини билдирган.

Бундан ташқари, ҳокимият алмашганидан кейин АҚШ Венесуэла нефти экспорти устидан назоратни кучайтирган. Дастлаб нефть савдосидан тушган маблағларнинг барчаси Каракас ихтиёрида қолиши айтилган. Бироқ Трамп маъмурияти йил бошидан буён ушбу савдолардан 13 миллиард доллардан ортиқ маблағ олгани айтилмоқда. Маблағларнинг бир қисми қаерга йўналтирилгани эса ҳозирча номаълум.

Эслатиб ўтамиз, аввалроқ Венесуэланинг муваққат президенти Дельси Родригес АҚШ ҳукуматидан мамлакати иқтисодиётига зарар етказаётган санкцияларни бутунлай олиб ташлашни сўраганди.