АҚШ суди грин-карта лотереясини қайта бошлашни буюрди

Федерал суд АҚШ Давлат департаментига DV-2027 грин-карта ўйинини ишга тушириш мажбуриятини юклади. Бу ҳақдаги тегишли қарор жорий йилнинг 14 октябрь куни Сан-Диегодаги федерал суд томонидан эълон қилинган.

Америка ОАВларининг хабарига кўра, идорага аризаларни топшириш ойнасини 2026 йил 18 октябрдан кечиктирмасдан очиш, танлаб олинган иштирокчиларни эса 19 ноябргача хабардор қилиш мажбурияти юкланган. Рўйхатдан ўтишнинг аниқ бошланиш санасини АҚШ Давлат департаменти эълон қилиши керак.

Олдинроқ Давлат департаменти кечикишни иштирок этиш тартибидаги ўзгаришлар билан изоҳлаган эди. 2025 йилнинг ноябрь ойида идора DV-2027 рўйхатдан ўтиш кунини кейинроқ эълон қилишини маълум қилган. Бироқ стандарт ариза топшириш муддати барибир бошланмаганди.

Лотереяда иштирок этиш учун нималар керак?

DV-2027 да иштирокчилар учун янги талаблар назарда тутилган:

• ариза топшириш учун амалдаги хорижий паспорт керак бўлади;
• электрон анкетага шахсий маълумотлар ва имзо қўйилган саҳифанинг сканерланган нусхасини юклаш талаб этилади;
• рўйхатдан ўтиш пуллик бўлади: ариза топширганлик учун 1 доллар тўлаш зарур;
• Бу чоралар фирибгарлик ва такрорий аризаларга қарши курашишга қаратилган.

Аризани АҚШ Давлат департаментининг расмий сайти – dvprogram.state.gov орқали топшириш мумкин бўлади. Расмий йўриқнома эълон қилингунга қадар иштирокчини олдиндан рўйхатдан ўтказишни ваъда қиладиган ёки ғалабани кафолатлайдиган воситачиларга ишонмаслик керак.

Суд қарорига кўра, танлаб олинган иштирокчилар 2026 йил 19 ноябргача хабардор қилиниши керак. Шу билан бирга, лотереяда ютиб чиқиш автоматик равишда грин-карта олишни англатмайди: иштирокчилар иммиграция визасини расмийлаштиришнинг кейинги босқичларидан ўтишлари керак бўлади.

DV-2027 иштирокчиларида ушбу жараёнлар учун вақт одатдагидан камроқ бўлади. Дастур бўйича визалар 2027 йил 30 сентябрдан кечиктирмасдан берилиши керак. 

Грин-карт ўзи нима?

Грин-карт (Green Card) – бу АҚШда доимий яшаш ҳуқуқини берувчи расмий гувоҳнома. У қуйидаги ҳуқуқларни беради:

• АҚШда чекловларсиз яшаш ва ишлаш;
• ижтимоий имтиёзларни олиш;
• келажакда фуқаролик учун ариза топшириш.

Diversity Visa Lottery ҳар йили ўтказилади. Унда АҚШга иммиграция даражаси паст бўлган мамлакатлар, жумладан, Ўзбекистон ва Қозоғистон фуқаролари иштирок этишлари мумкин.

Эслатиб ўтамиз, ўтган йилнинг декабрь ойида АҚШ Ички хавфсизлик вазирлиги грин-карта лотереяси (Diversity Visa Lottery) дастури тўхтатилганини эълон қилган эди. Ички хавфсизлик вазири Кристи Ноэмнинг сўзларига кўра, ушбу қарор Браун университети ва Массачусетс технология институтидаги (MIT) отишмада гумон қилинувчи мамлакатга 2017 йилда айнан ушбу дастур орқали келгани маълум бўлгач, Президент Дональд Трампнинг топшириғи билан қабул қилинган. Ушбу ҳодисада ўзбекистонлик талаба қурбон бўлган эди.