АҚШ Канаданинг $20 миллиардлик маҳсулотларига 50 фоизлик бож қўйди (видео)

АҚШ Президенти Дональд Трамп Канададан импорт қилинадиган қарийб 20 миллиард долларлик маҳсулотларга 50 фоизлик янги божлар жорий этилганини эълон қилди. Вашингтон бу қарорни Канаданинг Америкада ишлаб чиқарилган автомобиллар, алкоголь маҳсулотлари ва сут маҳсулотларига нисбатан “камситувчи сиёсати” билан изоҳлади. Бу ҳақда “Reuters” агентлиги хабар берди.

Қайд этилишича, янги тарифлар цемент, хоккей анжомлари, сут маҳсулотлари, сузиш ҳавзалари, мебель, балиқ овлаш анжомлари, уруғлик ва кийим-кечаклар каби кенг турдаги маҳсулотларга татбиқ этилади. 

Трамп мазкур қарорни 1930 йилги Божлар тўғрисидаги қонуннинг 338-моддаси асосида қабул қилган. Мазкур норма АҚШ маҳсулотларини камситган деб ҳисобланган савдо ҳамкорларига нисбатан президентга 50 фоизгача жазо тарифи жорий этиш ҳуқуқини беради. Бу модда қарийб бир асрлик тарихида илк бор қўлланилмоқда.

Маълум қилинишича, янги тарифлар 30 кундан кейин кучга киради. АҚШ Савдо вакили идораси маълумотига кўра, улар Канаданинг қарийб 20 миллиард долларлик импортига, яъни 2025 йилда АҚШ импорт қилган 382 миллиард долларлик Канада маҳсулотларининг тахминан 5,2 фоизига татбиқ этилади.

АҚШ Савдо вакили Жеймисон Грирнинг айтишича, маъмурият адолатли ва ўзаро манфаатли савдо келишувларини тузишда давом этаётган бир пайтда, Канада АҚШнинг савдо мувозанатини тиклаш ва миллий хавфсизлик учун муҳим саноат тармоқларини ҳимоя қилиш чораларига қарши жавоб чораларини қўллашда давом этмоқда.

Канада Бош вазири Марк Карни эса ҳукумати Вашингтон билан савдо можароларини ҳал қилиш бўйича кенг қамровли таклифлар киритганини билдирган. Унинг таъкидлашича, Трамп аввал жорий қилган тарифлар Шимолий Америка эркин савдо келишуви шартларини бузган.

“Бу савдо можароси, айниқса, АҚШда оилалар харажатларининг ошишига сабаб бўлди. Канада икки мамлакат фуқаролари манфаати йўлида ҳал этилмаган масалалар бўйича АҚШ билан фаол музокаралар олиб боришга тайёр”, деган Карни.

Нашрнинг ёзишича, 20 июль куни Нью-Жерсида бўлиб ўтган футбол бўйича жаҳон чемпионати финалида Трамп ва Карни учрашган. Учрашув чоғида Трамп Канаданинг ўрмон ёнғинлари туфайли АҚШга тарқалаётган тутун муаммосини ҳал қилишни талаб қилган. У ўтган ҳафта ушбу ифлосланиш харажатларини ҳам Канада товарларига нисбатан амал қилаётган тарифларга қўшиш билан таҳдид қилган.

Янги тарифлар 19 августдан кучга киради ва маҳсулотлар USMCA бўйича имтиёзларга эга бўлишидан қатъи назар амал қилади. Бироқ Трамп энергетика маҳсулотлари, калий ўғитлари, балиқ, стратегик минераллар ҳамда 232-модда асосида аллақачон тариф қўлланилаётган айрим товарларни ушбу чоралардан озод қилган.

Оқ уй тарифлар жорий этилишига асос сифатида Канаданинг сут бозорини ҳимоя қилиш сиёсати, шунингдек, АҚШдан импорт қилинадиган автомобилларга бошқа давлатларникига нисбатан юқорироқ тариф ва квоталар қўллашини ҳам кўрсатган.

Шунингдек, Вашингтон маълумотига кўра, Канаданинг аксарият провинциялари аввалги АҚШ тарифларига жавоб сифатида Америка алкоголь маҳсулотлари савдосини тўхтатган. Оқ уйнинг билдиришича, ўтган бир йил ичида Канаданинг АҚШ автомобиллари импорти 22 фоизга, алкоголь маҳсулотлари импорти эса 81 фоизга камайган.

Эслатиб ўтамиз, аввалроқ АҚШ Президенти Дональд Трамп Канададаги ўрмон ёнғинлари тутуни АҚШ ҳудудига тарқалаётгани учун Оттавани айблаб, бу ифлосланишни бартараф этиш харажатлари Канада товарларига қўлланилаётган мавжуд тарифларга қўшилишини маълум қилганди.