АҚШ Эронга қарши “тарихдаги энг қаттиқ санкциялар”ни қўлламоқчи

АҚШ Эронга қарши “тарихдаги энг қаттиқ санкциялар”ни жорий этишни режалаштирмоқда. Бу ҳақда мамлакат Молия вазири Скотт Бессент маълум қилди.

Бессентнинг айтишича, янги иқтисодий босим Эронга қарши кенг кўламли ҳарбий амалиётларни қайта бошлаш эҳтимолини камайтириши мумкин. У янги санкциялар пакети тафсилотлари келаси ҳафта, 24 август куни ўтказиладиган матбуот анжуманида эълон қилинишини билдирган.

Бу баёнот АҚШ Президенти Дональд Трампнинг бир кун аввал Эронга ҳар қандай кўмак кўрсатадиган давлатларга нисбатан “иқтисодий уруш” ва жиддий иқтисодий оқибатлар билан таҳдид қилганидан кейин янгради. Трамп молиявий муассасалар, компаниялар, аэропортлар ёки давлат идоралари орқали Эронга ёрдам берадиган ҳар қандай мамлакат ҳам қаттиқ чораларга дуч келишини айтганди.

Бессент CNBC телеканалига берган интервьюсида АҚШнинг стратегияси Эронга қарши блокада ва янги санкцияларни бир вақтнинг ўзида қўллашдан иборат эканини таъкидлаган. Унинг сўзларига кўра, Вашингтон максимал иқтисодий босим орқали Теҳронга таъсир ўтказишни мақсад қилган.

Шу орада АҚШ таҳдидлари ортидан жаҳон бозорида нефть нархи уч ҳафтадан ортиқ вақтдаги энг юқори даражага кўтарилди. Бунга Форс кўрфазида давом этаётган можаро ва Ҳормуз бўғози орқали нефть ташиш билан боғлиқ хавотирлар сабаб бўлган.

Эрон Ташқи ишлар вазирлиги АҚШнинг янги иқтисодий ва савдо чекловларини “иқтисодий терроризм” деб баҳолаган. Теҳрон бундай босим мамлакатнинг мустақиллиги, қадр-қиммати ва миллий суверенитетини ҳимоя қилиш қатъиятига таъсир қилмаслигини маълум қилган.

2025 йилги Kpler маълумотларига кўра, Эрон экспорт қилаётган нефтьнинг 80 фоиздан ортиғини Хитой харид қилади. Шу сабабли АҚШнинг Эрон билан иқтисодий алоқаларни сақлаб турган Пекинга нисбатан қўшимча босим ўтказиши икки давлат ўртасидаги муносабатларни янада кескинлаштириши мумкин.

Хитойнинг Вашингтондаги элчихонаси эса санкциялар ва босим муаммони ҳал қилишга ёрдам бермаслигини билдириб, барча томонларни масалани сиёсий ва дипломатик йўл билан ҳал қилишга чақирган.

Эрон Ташқи ишлар вазири Аббос Ароқчи эса Трампнинг баёнотларини АҚШдаги ички иқтисодий муаммолардан жамоатчилик эътиборини чалғитишга уриниш деб баҳолаган. Унинг фикрича, Вошингтон аввал ҳам самара бермаган сиёсатни давом эттирса, бу яна янги муваффақиятсизликларга олиб келади.