Трамп Эронни қўллаб-қувватлаган давлатларга таҳдид қилди

АҚШ Президенти Дональд Трамп Эронга ҳар қандай кўринишда ёрдам берадиган давлатлар жиддий иқтисодий оқибатларга дуч келишини билдирди. Бу ҳақда у кеча, 19 август куни ижтимоий тармоқдаги баёнотида сўз очди.

Трамп Эронга молиявий ташкилотлар, компаниялар, аэропортлар ёки давлат идоралари орқали “ҳар қандай ёрдам” кўрсатган мамлакатларга “мисли кўрилмаган иқтисодий уруш ва яккалаш” қўлланишини таъкидлаган. У Вашингтон Эрон билан урушни якунлаш ва Ҳормуз бўғози орқали нефть ташишни тиклашга уринаётган бир пайтда мамлакатга нисбатан иқтисодий босимни кучайтиришини айтиб ўтган. 

Бироқ АҚШ Президенти қайси давлатларга нисбатан қандай чоралар кўрилишини аниқлаштирмаган. Шу билан бирга, уруш бошланганидан бери Ҳормуз бўғозидаги вазият жаҳон нефть бозорига жиддий таъсир кўрсатган.

Трампнинг баёноти Эрон билан мулоқотлар тақдири ноаниқ бўлиб турган пайтга тўғри келди. Эрон раҳбари маслаҳатчиси Муҳаммад Мохбер мамлакат музокараларга очиқ эканини, аммо мулоқотни таслим бўлиш билан адаштирмаслик кераклигини айтган. 

Хитой Эрон нефтининг асосий харидори ҳисобланади. Бундай шароитда Вашингтоннинг Пекинга нисбатан қўшимча иқтисодий босим ўтказиши икки давлат ўртасида янги кескинликни келтириб чиқариши мумкин.

Эслатиб ўтамиз, аввалроқ Эроннинг давлатга қарашли телеканали эфирида АҚШ Президенти Дональд Трампни ўлдириш учун мукофот пули йиғишга чақириқ янграганди.