АҚШ айрим давлатларни доллардан маҳрум қилиши мумкин

АҚШнинг Эронга қарши янги санкцияларига риоя қилмайдиган давлатлар Америка долларидан фойдаланиш имконидан маҳрум бўлиши мумкин. Бу ҳақда АҚШ Молия вазири Скотт Бессент маълум қилди.

Унинг сўзларига кўра, Вашингтоннинг янги санкцияларига амал қилмайдиган давлатлар амалда доллар тизимидан чиқарилиши мумкин.

Бессент АҚШнинг Эронга қарши янги сектор санкциялари қачондан кучга киришини аниқ айтишдан бош тортган. Унга кўра, АҚШ маъмурияти санкцияларни жорий этишни бироз кечиктиришга тайёр.

“Мен нега жаҳон молия тизимини портлатишни исташим керак?” деган Бессент.

Унинг таъкидлашича, бошқа давлатлар жараён жуда тез ривожланишини ва Вашингтоннинг бу борадаги позицияси жиддий эканини билиши керак. Вазир иккиламчи санкцияларни “жуда кучли восита” деб атаган.

“Биз олдиндан огоҳлантириш ва Вашингтоннинг нималарни кутаётганини тушунтиришни ўринли деб ҳисоблаймиз. Агар одамлар бизнинг талабларимизга жавоб беришни истамаса, унда улар доллар тизимидан чиқиб кетишга тайёр бўлишлари керак”, деган АҚШ Молия вазири.

Бессент санкцияларга риоя қилмайдиган давлатларга нисбатан айнан қандай чоралар қўлланилишини ошкор қилмаган.

Эслатиб ўтамиз, аввалроқ АҚШ Эрон ҳукуматининг барча даромад манбаларини янги санкциялар орқали тўсишга қаратилган “Иқтисодий яккалаш” операциясини бошлаганини маълум қилганди.