Афсонавий шахматчи президентлик таклифини рад этди

Аввалроқ, Венгрия Бош вазири Петер Мадьяр мамлакатнинг кейинги президенти лавозимига барча даврларнинг энг кучли аёл шахматчиси сифатида тан олинган Юдит Полгар номзодини таклиф қилган эди. Бироқ Юдит Полгар бу таклифни рад этди. Бу ҳақда у кеча, 20 июль куни ўзининг Facebook ижтимоий тармоғидаги саҳифасида маълум қилди.

Қайд этилишича, Венгрия парламенти Конституцияга киритилган ўзгартиришларни қабул қилгач, Президент Тамаш Шуйокнинг ваколатлари якунланган. Шундан сўнг, Бош вазир Петер Мадьяр Юдит Полгарни президентликка номзод сифатида таклиф қилган.

Полгар ижтимоий тармоқдаги саҳифасида президентликка номзод этиб кўрсатилганини ҳаётидаги энг катта шараф деб атаб, мустақил ва партиялардан холи номзодни излагани учун Бош вазирга миннатдорлик билдирган. Бироқ у президентлик лавозимини эгаллашга тайёр эмаслигини айтган.

“Тарихий жиҳатдан бўлинган халқни бирлаштиришдек масъулиятни ўз зиммамга олиш учун ўзимни етарлича кучли деб ҳисобламайман. Шу сабабли, бу таклифни қабул қила олмайман”, деган Полгар.

Шунингдек, у президентлик сайловида кўрсатиладиган бошқа мустақил номзодни қўллаб-қувватлашини билдирган.

Қайд этилишича, Петер Мадьяр бошчилигидаги “Тиса” партияси парламентда Конституцияга ўзгартириш киритиш учун зарур кўпчиликни қўлга киритган. Конституциявий ўзгартириш кучга киргач, Мадьяр илм-фан, маданият ва спорт соҳаларидаги 16 нафар таниқли шахс тавсияси билан Юдит Полгар номзодини илгари сурган.

“Азиз Юдит! Венгрия учун қилган барча ишларингиз учун раҳмат! Миллионлаб венгерлар номидан шуни айта оламанки, бошқа бир ролда бўлса ҳам, келажакда ҳам сизга умид боғлаймиз”, деб ёзган Петер Мадьяр Полгарнинг қарорига муносабат билдириб.

Маълумот учун, Юдит Полгар тарихдаги энг кучли аёл шахматчи сифатида эътироф этилади. У 1976 йил 23 июлда Венгрия пойтахти Будапештда туғилган. Полгар 1991 йилда 15 ёш-у 4 ойлигида гроссмейстер унвонини (шахмат ва шашкадаги энг юксак спорт унвони) қўлга киритиб, ўша пайтда Бобби Фишерга тегишли бўлган энг ёш гроссмейстер рекордини янгилаган. У, шунингдек, FIDE (Халқаро шахмат федерацияси) рейтингида 2700 очколик маррадан ошган ва жаҳоннинг энг кучли 10 нафар шахматчиси қаторига жой олган ягона аёл ҳисобланади. Фаолияти давомида Гарри Каспаров, Анатолий Карпов, Вишванатан Ананд, Владимир Крамник ва Магнус Карлсен каби амалдаги ҳамда собиқ жаҳон чемпионлари устидан ғалаба қозонган. 2014 йилда профессионал спортдаги фаолиятини якунлаган Полгар ҳозирда шахматни оммалаштириш, таълим лойиҳалари ва халқаро турнирларда шарҳловчилик билан шуғулланади.