Абу-Дабидаги Россия – Украина музокараларида европалик мулозимлар ҳам қатнашади – FT 

Европа мамлакатлари жорий йилнинг 10–11 ноябрь кунлари Абу-Дабида бўлиб ўтадиган Россия, АҚШ ва Украинанинг уч томонлама музокараларига юқори лавозимли мулозимларини юборади. Бу ҳақда вазиятдан хабардор мулозимларга таяниб, “Financial Times” хабар берди.

Манбаларнинг сўзларига кўра, саммитда Европа “учлиги” – Франция, Германия ва Буюк Британиянинг миллий хавфсизлик бўйича маслаҳатчилари иштирок этади. Бундан ташқари, воқеа жойига Еврокомиссия раиси ва НАТО бош котиби аппарати раҳбарлари етиб боради. Улар “музокараларнинг алоҳида босқичларида” иштирок этиши режалаштирилган.

Европа мамлакатлари АҚШ Президенти Дональд Трамп ва унинг куёви Жаред Кушнер келишувнинг бир қисми Европанинг янада кенгроқ хавфсизлик архитектураси бўлиши мумкинлигини айтганидан сўнг саммитга ўз вакилларини юборишга қарор қилган. Хусусан, юқори лавозимли Европа мулозимлари Россиянинг мазкур учрашувдан ушбу масалада ўз талабларини сингдириш учун фойдаланишга бўлган эҳтимолий уринишларининг олдини олиши керак. Аввалроқ, Москва НАТО машғулотларини ва Шарқий Европада алоҳида қурол-яроғ тизимларини жойлаштиришни келишиб олиш ҳуқуқини талаб қилган. Бироқ Европа пойтахтларида бундай ёндашув “совуқ уруш” услубидаги таъсир доираларига қайтиш сифатида кўрилмоқда.

Шу билан бирга, Европа қитъадаги хавфсизлик бўйича ҳар қандай муҳокамалар фақат Украина билан тинчлик музокараларидан сўнг бошланиши кераклигини таъкидламоқда. Нашр манбалари Киевга хавфсизлик кафолатлари ва мамлакатни урушдан кейинги иқтисодий тиклашни муҳокама қилиш айни пайтда Европа мамлакатлари учун юқорироқ устуворликка эга эканини урғулаган.

Бунгача Америка Президентининг куёви Жаред Кушнер Вашингтон Украина, НАТО ва европалик шериклар билан Киев учун хавфсизлик кафолатлари ҳамда Европа хавфсизлиги архитектураси бўйича “маҳсулдор ва мазмунли” музокаралар ўтказганини маълум қилган. У, шунингдек, АҚШ Украина ва Россия билан уч томонлама музокараларни “максимал даражада мазмунли ва маҳсулдор” қилиш имконини берадиган “жиддий таклифлар” устида ишлаётганини айтган.

Шу билан бирга, уч томонлама учрашувда Россия делегациясига “қатъий позиция тарафдори” деб аталадиган Президент ёрдамчиси Владимир Мединский бошчилик қилади. Ўтган йилнинг июнь ойида Туркияда Украина томони билан бўлиб ўтган учрашувлардан биридан сўнг у Украина урушни якунлаш учун Москва шартларини қабул қилиши, Ғарб билан интеграциядан воз кечиши кераклигини айтган, шунингдек, Россия “қанча керак бўлса, шунча” урушишга тайёрлигини таъкидлаган.