800 минг киши кўчада: Францияда намойишлар қайта бошланди (фото)

Францияда кеча, 24 октябрь куни нархларнинг ошишига қарши яна кўп минг кишилик митинглар бўлиб ўтди. Бу ҳақда “Reuters” хабар берди. 

Ҳокимият органлари маълумотларига кўра, турмуш даражасининг пасайиши ва нархларнинг ошишига, шунингдек, таълим соҳасининг етарлича молиялаштирилмаганига қарши намойишларда 410 000 киши иштирок этган. Касаба уюшмалари эса 800 000 дан ортиқ намойишчи кўчага чиққанини айтмоқда. Ҳукумат 70 000 нафар полициячи ва жандармни сафарбар этган. Бу ўтган дам олиш кунларидагига қараганда 10 000 нафарга кўп. 

Ички ишлар вазирлиги маълумотига кўра, Парижда 110 000 га яқин одам байроқларни силкитиб ва кун сайин ортиб бораётган яшаш нархи ҳамда чуқурлашиб бораётган тенгсизликни қораловчи шиорларни ҳайқириб, шаҳар бўйлаб марш ўтказган. 

“Давлат, полиция ва фашистларга ўлим!” дея ҳайқирган парижликлар.

Дастлаб Франция пойтахтидаги митинг нисбатан тинч ўтган, бироқ намойишчилар гуруҳининг охирида бораётган тажовузкор ёшлар полициячиларга тош ва бошқа буюмларни отиб, тўқнашувлар келтириб чиқарган. Ҳуқуқ-тартибот ходимлари “капюшон” кийган тартиббузарларни ҳайдаб юбориш учун кўздан ёш оқизувчи газ ва сув пуркагичларни қўллаган. 

Тўқнашувлар, шунингдек, Лион, Бордо, Гренобль, Марсель, Монпелье, Нант ва Тулузада ҳам содир бўлган, полиция эса Нант, Бордо, Клермон-Ферран, Лилль ва Ниццада намойишчиларга қарши кўздан ёш оқизувчи газ ишлатган. Зўравонлик даражаси талончилар ва вандаллар Париж ҳамда бошқа шаҳарларда тартибсизликлар уюштирган ўтган ҳафтадагига қараганда анча кам миқёсда бўлган. 

“Биз ўта тезкор ҳаракат қилишимиз керак”, дейди журналистларга Франция ИИВ раҳбари Лоран Нуньес. 

У, шунингдек, ўта сўл фаоллар ва жиноий гуруҳларни зўравонликни авж олдиришга уринишда айблаган. Вазирнинг сўзларига кўра, тушга қадар бутун мамлакат бўйлаб 135 киши ҳибсга олинган, уларнинг кўпчилиги профилактик тинтувлар натижасида қўлга олинган. Тинтувлар давомида пиротехника воситалари ва қурол сифатида ишлатилиши мумкин бўлган бошқа буюмлар аниқланган.

Ушбу дам олиш кунларида Франция ҳокимияти хавфсизлик чораларини кучайтирган, кўплаб корхоналар ва савдо шохобчалари эса хавфнинг олдини олиш мақсадида витриналарни тахта билан билан ёпиб ташлашни ёки кун давомида умуман ёпиқ туришни афзал кўрган. Шунингдек, музейлар ва театрлар, жумладан, Лувр, Орсе музейи ва Париж операси ёпилган, 20 дан ортиқ метро станцияси ишламаган.

Эслатиб ўтамиз, аввалроқ БМТ Бош котиби Антониу Гутерриш Европа ва бошқа минтақаларни қамраб олган норозилик намойишлари чоғида содир этилаётган зўравонлик ҳаракатларини қоралаганди ҳамда норозиликлар сабабини урушларнинг иқтисодий оқибатлари билан боғлаган эди.