6 яшар қиз жаҳон рекордини икки бор янгилади (видео)

Хитойлик 6 ёшли Лянь Юньчжи 3х3х3 ўлчамдаги Рубик кубигини йиғиш бўйича аёллар ўртасидаги жаҳон рекордини уч кун ичида икки марта янгилади. Бу ҳақда BBC хабар берди.

Қайд этилишича, Сичуань провинциясидан бўлган Лянь Юньчжи Ухань ва Гуанчжоу шаҳарларида ўтказилган мусобақаларда иштирок этган. У дастлаб кубикни ўртача 4,52 сонияда йиғиб, жаҳон рекордини ўрнатган.

Орадан кўп ўтмай, у ўз натижасини яна яхшилаб, Рубик кубигини ўртача 4,27 сонияда йиққан. Шу тариқа Лянь Юньчжи дунёда 3х3х3 Рубик кубигини ўртача 4,5 сониядан кам вақтда йиға олган ягона аёл иштирокчига айланган. Ёш иштирокчи бундай натижага бир йил давомида олиб борган жадал машғулотлари орқали эришган. У ҳар куни 2-3 соат вақтини Рубик кубигини йиғишга сарфлаган.

Маълум қилинишича, Лянь Юньчжи ҳозирга қадар кубикни йиғишнинг 1300 дан ортиқ алгоритмини ўзлаштирган.

Маълумот учун, Рубик кубиги ўз номи унинг ихтирочисидан олинган. Ушбу бошқотирма ўйинчоқ 1974 йилда венгриялик ихтирочи, архитектор ва ҳайкалтарош Эрнё Рубик томонидан ихтиро қилинган. Бошқотирма тез орада кенг оммалашган ва у ихтирочисининг номи билан аталадиган бўлган. Польшада бу ўйинчоқ “Kostka Rubika” деб аталади, ихтирочининг ватани Венгрияда эса у “сеҳрли куб” деб номланади. Рубик кубигининг ихтирочиси ҳозиргача Венгрияда яшайди, бироқ у ўз ихтиросининг мухлислари ҳаётида унчалик фаол иштирок этмайди.

Эслатиб ўтамиз, аввалроқ 9 ёшли Теодор Зайдер Gdansk Speedcubing League мусобақасида Рубик кубигини 2,766 сонияда йиғиб, янги рекорд эгасига айлангани ҳақида хабар берилган эди.