24 ёшли эркак уч ойлик чақалоқни йиғлагани учун уриб ўлдирди

Англиянинг Кент графлигида 24 ёшли эркак қиз дўстининг уч ойлик ўғлини йиғлашдан тўхтамагани учун уриб ўлдирди. Суд уни қотиллик ва қасддан оғир тан жароҳати етказишда айбдор деб топди. Бу ҳақда “Daily Mail” хабар берди.

Судда маълум бўлишича, Тайла Уормби 2022 йил 15 июлга ўтар кечаси қиз дўсти Шеннон Ҳоджес ухлаётган пайтда унинг 12 ҳафталик ўғлига қараб турган. Чақалоқ боланинг биологик отаси бўлмаган Уормбининг қарамоғида қолган.

Эрталаб соат 05:30 дан кўп ўтмай, боланинг онаси унинг аҳволидан хавотирланиб, тез ёрдам чақирган. Чақалоқнинг ранги оқариб кетган, ўзи эса ҳушсиз ҳолатда бўлган. Унинг боши ҳам сезиларли даражада шишиб кетган. Онаси тез ёрдам операторига боланинг бошига текканда қаттиқ йиғлаётганини айтган.

Шифокорлар чақалоқнинг бош суяги сингани ва мияси кучли шишганини аниқлаган. Дастлаб у Маргейт шаҳридаги шифохонага олиб борилган, кейинчалик жароҳатлари оғирлиги сабабли Лондондаги шифохонага кўчирилган. Бироқ ўша куни тушдан кейин юраги тўхтаб, вафот этган.

Тергов давомида Уормби полицияга воқеа қандай содир бўлгани ҳақида ёлғон гапиргани аниқланган. У чақалоқни эрталаб соат 04:00 да уйғонганида бошида кичик шиш билан кўрганини, унга дори бериб, яна ётқизганини айтган. Ярим соатдан кейин боланинг қаттиқ йиғлаётганини эшитиб, бошининг орқа қисми шишиб кетганини пайқаганини билдирган.

Бироқ рақамли экспертиза ва тиббий далиллар Уормби чақалоққа тез ёрдам чақирилишидан бироз олдин атайлаб ўлимга олиб келадиган жароҳат етказганини кўрсатган. Экспертлар у бундан аввал ҳам болани қаттиқ силкитиб, жароҳат етказган деган хулосага келган.

Судда чақалоқ ўлимидан олдинги ҳафталарда бир неча бор шифохонага олиб борилгани ҳам маълум бўлган. У тез-тез қусган, танаси бўшашиб қолган ва одатдагидан кўпроқ йиғлаган. Шифокорлар бу белгилар чақалоқни силкитиш синдромига хос эканини айтган. Суд-тиббий экспертиза эса боланинг миясида ўлимидан беш ҳафтагача олдин ҳам қон кетиши кузатилганини аниқлаган.

Шунингдек, чақалоқнинг биологик отаси унинг хавфсизлигидан хавотир билдирганидан сўнг, бола ижтимоий хизматлар назоратига олингани маълум бўлган.

24 ёшли Уормби судда қотиллик ва қасддан оғир тан жароҳати етказиш айбловларини рад этган. Бироқ кеча, 29 октябрь куни судялар кенгаши кўпчилик овоз билан уни ҳар икки жиноятда айбдор деб топган.

Кент полицияси тергов бўлими катта инспектори Адам Маршалл тергов гуруҳи мураккаб тиббий ва криминалистик далилларни ўрганиб, эркакнинг ёлғонларини фош қилганини билдирган. Уормбига нисбатан ҳукм эса кейинроқ эълон қилинади.

Эслатиб ўтамиз, аввалроқ Буюк Британиянинг Шеффилд шаҳрида янги туғилган қизалоқ 15 марта пичоқланиб, жами 33 та жароҳат билан ўлик ҳолда топилган эди. Чақалоқни ўлдиришда айбланаётган тўрт киши, жумладан, унинг 20 ёшли онаси Андреа Скопова судга тортилган.