Ҳусниддин Алиқулов жароҳатдан сўнг машғулотларга қайтди

Ўзбекистон миллий терма жамоаси ва Туркиянинг “Ризеспор” клуби ҳимоячиси Ҳусниддин Алиқулов жароҳатидан сўнг жамоа билан гуруҳ машғулотларига қайтди. Бу ҳақда клуб матбуот хизмати хабар берди.

Маълум қилинишича, футболчи бир муддатдан буён жамоа билан тўлиқ машғулотларда иштирок этмоқда. Бироқ унинг жисмоний ҳолати ҳозирча расмий учрашувда майдонга тушиш учун етарли даражада эмас. Шу боис Алиқуловнинг қачон майдонга қайтиши борасида аниқ муддат маълум қилинмаган.

“Олдинги хочсимон боғлам, мениск ва ички ён боғлам жароҳатлари сабабли 7,5 ой аввал муваффақиятли жарроҳлик амалиётини бошдан кечирган Хусниддин Алиқулов бир муддатдан буён жамоа билан тўлиқ машғулотларда иштирок этмоқда. Бироқ футболчининг жисмоний ҳолати ва атлетик кўрсаткичлари ҳозирча расмий ўйинда майдонга тушиш учун етарли даражада эмас, деб баҳоланган”, дейилади клубнинг расмий баёнотида.

Маълумот учун, Ҳусниддин Алиқулов жорий йилнинг 19 январь куни “Гёзтепе” билан ўйинда жиддий жароҳат олиб, майдонни тарк этишга мажбур бўлган эди. Ўтказилган текширув ва таҳлиллар натижасида Алиқуловнинг чап тиззасида ACL (олдинги кесишган боғ) йиртилиши, тизза панжаси ярим чиқиши (Patellar Subluxation) ва бунинг натижасида тизза боғи (MPFL) шикастланиши, шунингдек ички ва ташқи менискусларда йиртилиш, қон кетиши ва шишиш аниқланган. Шундан сўнг Алиқулов жарроҳлик амалиётини бошлан ўтказганди.