Ҳусийлар Ар-Риёддаги аэропортга яна ҳужум қилди. 12 киши ҳалок бўлди

Кеча, 10 октябрь куни Ямандаги Эрон томонидан қўллаб-қувватланадиган ҳусийлар Саудия Арабистони пойтахти Ар-Риёддаги халқаро аэропортга ҳужум қилди. Оқибатда камида 12 киши ҳалок бўлди, яна 309 киши яраланди. Бу Саудия Арабистонида сўнгги ўн йилдан ортиқ вақт ичида энг кўп қурбон берилган ҳужум бўлди. Бу ҳақда 10 октябрь куни “Reuters” хабар берди.

Саудия Арабистони Фуқаро авиацияси бошқармаси маълумотларига кўра, ҳалок бўлганлар орасида тўрт нафар саудиялик, икки нафар бангладешлик ҳамда АҚШ, Иордания, Фаластин, Сурия, Судан ва Мисрдан бир нафардан фуқаро бор.

Ҳужумдан кейин ярадорлар тез ёрдам машиналари ва вертолётлар ёрдамида шифохоналарга олиб борилган. Айрим жабрланувчиларнинг аҳволи оғир экани айтилмоқда. Аэропортдаги гувоҳлардан бири портлаш овозини эшитгани ва бино ичида бир неча кишининг жароҳатланган ҳолда ерда ётганини кўрганини айтган. Яна бир йўловчининг сўзларига кўра, у аэропорт ташқарисида осмондан бирор нарса учиб ўтганини кўрган, шундан кейин жўнаб кетиш дарвозаси яқинидаги шифтнинг бир қисми қулаб тушган.

Ҳужум сабаб Ар-Риёд халқаро аэропортидаги барча рейслар бошқа йўналишларга йўналтирилган, аэропорт фаолияти эса вақтинча тўхтатилган. АҚШнинг Ар-Риёддаги элчихонаси ўз фуқароларини аэропорт ва унинг атрофидаги ҳудудларга бормасликка чақирган. Аввалги ҳужумлардан кейин ҳам бир қатор авиакомпаниялар Саудия Арабистони пойтахтига қатновларни бекор қилган ёки тўхтатган.

Бу ҳафта Ар-Риёддаги Қирол Холид халқаро аэропортига уюштирилган аввалги икки ҳужум оқибатида яна тўрт киши ҳалок бўлган. Шунингдек, аэропорт ҳудудида турган Саудия Арабистонига тегишли йўловчи самолёти жиддий шикастланган. Сўнгги ҳужумлар мамлакатнинг ҳаво ҳужумидан мудофаа тизимидаги заиф жиҳатларни кўрсатган.

Бироқ ҳусийлар 10 октябрь кунги ҳужум учун ҳозирча жавобгарликни расман ўз зиммасига олмаган. Шунга қарамай, Саудия Арабистони бошчилигидаги ҳарбий коалиция зарбага жавоб қайтаришини билдирган. Ҳусийларнинг ОАВ бўйича идораси раҳбари эса ижтимоий тармоқдаги саҳифасида Ар-Риёд халқаро аэропорти фаолияти тўхтатилганини ёзган. Гуруҳ аввалроқ халқаро авиакомпанияларни Саудия Арабистони ҳаво ҳудудидан фойдаланмаслик ҳақида огоҳлантирган эди.

Эслатиб ўтамиз, аввалроқ Саудия Арабистонида ҳусийлар томонидан амалга оширилгани айтилган икки ҳужум оқибатида 3 нафар фуқаро ҳалок бўлиб, 36 киши жароҳатлангандади.