Ҳиндистонда поезднинг тўртта вагони ёниб кетди (видео)

Ҳиндистонда Амритсар–Нью-Жалпайгури йўналишида ҳаракатланаётган поездда ёнғин чиқиши оқибатида 1500 нафарга яқин йўловчи эвакуация қилинди. Ҳодиса оқибатида 16 нафар йўловчи шифохонага мурожаат қилган, улардан саккиз нафари енгил куйиш жароҳатини олган. Бу ҳақда “The Times of India” хабар берди.

Маълум қилинишича, ёнғин кеча, 6 ноябрь куни тушдан кейин Панжоб штатидаги Сарой-Банжара темирйўл бекати яқинида содир бўлган. Поезд Садхугарх қишлоғидан ўтганидан кўп ўтмай, вагонлардан бирида ёнғин бошланган. Қисқа вақт ичида тутун бошқа вагонларга ҳам тарқалган.

Маълумотларга кўра, Ражпура шаҳридаги шифохонага 15 нафар йўловчи олиб борилган. Уларнинг саккиз нафари енгил куйиш жароҳатини олган, қолганларида эса енгил жароҳатлар кузатилган. Яна бир йўловчи Фотихгарҳ-Соҳибдаги шифохонада даволанган. Шифокорлар барча жабрланганларнинг аҳволи барқарор эканини билдирган.

Ёнғин сабаб поезд тўхтатилган ва тўртта умумий вагон ажратиб олинган. Ҳодиса жойига тўртта ёнғин-қутқарув экипажи, полиция ходимлари ва тиббий гуруҳлар жалб этилган. Маҳаллий аҳоли ҳам ёнғинни ўчириш ишларига ёрдам берган.

Дастлабки тахминларга кўра, вагонлардан биридаги вентиляторда қисқа туташув юз берган ва бу ёнғинга сабаб бўлган. Бироқ ҳодисанинг аниқ сабаби ҳали маълум эмас. Темирйўл маъмурияти батафсил текширув ўтказишини билдирган.

Йўловчилардан бири Маниндер Моҳаннинг айтишича, у Муззаффарпурга кетаётган бўлганида вагонни тутун қоплаган. У поезддан чиқиб кетиш учун фавқулодда ойна ойнасини синдириб, ташқарига сакраган ва енгил жароҳат олган.

Хавфсизлик чораси сифатида ҳодиса жойидаги электр линияларида ток ўчирилган, поездлар ҳаракати вақтинча тўхтатилган. Йўловчиларга озиқ-овқат, ичимлик суви ва транспорт воситалари билан ёрдам кўрсатилган. Шунингдек, уларнинг сафарини давом эттириши учун Сарай-Банджара бекатидан Нью-Жалпайгури йўналишига иккита махсус поезд юборилган.

Эслатиб ўтамиз, аввалроқ Покистоннинг Панжоб вилоятида йўловчи поездининг рельсдан чиқиб кетиши оқибатида камида олти киши ҳалок бўлди ва 30 киши жароҳатлангани ҳақида хабар берилган эди.