Ҳегсет билан зиддият ортидан АҚШ армияси мулозими ишдан кетди

АҚШ Қуруқлик қўшинлари котиби Дан Дрисколл Мудофаа вазири Пит Ҳегсет билан бир неча ой давом этган келишмовчиликлардан сўнг Президент Дональд Трампга истеъфосини тақдим этди. Бу ҳақда “Reuters” хабар берди.

Қайд этилишича, Дрисколлнинг истеъфоси ҳозирча Оқ уй томонидан қабул қилинган-қилинмагани маълум эмас. У АҚШ вице-президенти Жей Ди Вэнсга яқин шахс сифатида танилган ва Ҳегсет раҳбарлигида Пентагонда лавозимини тарк этаётган навбатдаги юқори мартабали амалдор бўлган.

Манбаларга кўра, Дрисколл ва Ҳегсет ўртасидаги зиддиятлар асосан АҚШ армиясини модернизация қилиш, унинг жанговар тайёргарлиги ва қўшинлар тузилмасидаги ўзгаришлар масалаларида юзага келган.

Дрисколл армияни модернизация қилиш бўйича бир қатор ташаббусларни илгари сурган. У мудофаа саноатидаги йирик компанияларни танқид қилиб, армия учун қурол-яроғ ва технологияларни харид қилиш тизимини тезроқ ва арзонроқ қилиш зарурлигини таъкидлаган.

Айрим америкалик амалдорлар Ҳегсет Дрисколлни анчадан бери лавозимидан четлатишни истаганини билдирган. Дрисколл эса армияни ислоҳ қилиш жараёнига Ҳегсетнинг аралашувидан норози бўлгани айтилмоқда.

Маълум қилинишича, уларнинг келишмовчилиги юқори лавозимдаги ҳарбий раҳбарларнинг ишдан кетиши билан янада кучайган. Жумладан, АҚШ армияси штаби бошлиғи генерал Рэнди Жорж жорий йилнинг апрель ойида лавозимидан четлатилган. Европа ва Африкадаги АҚШ қуруқлик қўшинлари қўмондони ҳам ўзгарган.

Маълумот учун, Дрисколл 2025 йил февраль ойида Сенат томонидан тасдиқланганидан сўнг Қуруқлик қўшинлари котиби лавозимига киришган. У шунингдек, Россия ва Украина ўртасидаги урушни тугатиш бўйича музокараларда АҚШ томонидан дипломатик вазифани бажарган.

Унинг истеъфоси АҚШ армияси раҳбариятидаги навбатдаги катта ўзгариш бўлмоқда. Манбага кўра, Дрисколлнинг ўринбосари Дэйв Фицжеральд ҳам яқин орада лавозимини тарк этиши кутилмоқда.

Дрисколл истеъфога чиққан пайтда АҚШ Эрон билан урушда иштирок этмоқда ва минглаб америкалик ҳарбийлар Яқин Шарқда жойлаштирилган. Шу сабабли унинг кетиши Пентагондаги раҳбарият барқарорлиги ва армиянинг бошқаруви юзасидан саволларни янада кучайтириши мумкин.

Оқ уй Дрисколлнинг армия жанговар тайёргарлиги ва стратегик дипломатияга қўшган ҳиссасини юқори баҳолаган, бироқ унинг истеъфоси сабабларига расмий баҳо бермаган.

Эслатиб ўтамиз, аввалоқ Эслатиб ўтамиз, Федоров шу ойда мудофаа вазири лавозимидан озод этилганди ва бу қарор Украинада уруш давридаги камсонли норозилик намойишларига сабаб бўлганди.