Ҳаводаги даҳшат: парвоздаги самолётнинг ойнаси узилиб, йўловчи ташқарига чиқиб қолди

Грециядан Германияга йўл олган Ryanair авиакомпанияси самолётида ҳавога кўтарилганидан кўп ўтмай фавқулодда ҳодиса юз берди – самолёт ойнасининг синиб кетиши оқибатида бир йўловчи қисман ташқарига тортилиб кетди. Бу ҳақда “Reuters” агентлиги хабар берди.

Грециянинг Салоники шаҳридан Германиянинг Мемминген аэропортига парвоз қилаётган Ryanair авиакомпаниясининг Boeing 737 самолёти кеча, 10 июль куни ҳавога кўтарилганидан кўп ўтмай фавқулодда қўнишга мажбур бўлди. Ryanair баёнотига кўра, парвоз вақтида йўловчи ойнасининг узилиб кетиши сабабли самолёт Салоникига қайтган. Компания ойна қандай қилиб шикастланганига аниқлик киритмаган.

Қайд этилишича, Сербия фуқароси бўлган йўловчи ойна узилиб кетгач, қисман самолёт ташқарисига тортилиб кетган. У Салоникидаги AHEPA университет шифохонасига олиб борилган. Сербия консуллигининг маълум қилишича, унинг ҳаёти хавф остида эмас, шифокорлар жароҳатлар даражасини баҳоламоқда.

Сербия оммавий ахборот воситаларининг “Radio Thessaloniki” радиосига таяниб хабар беришича, йўловчининг боши ва елкалари самолёт ташқарисига чиқиб кетган, бошқа йўловчилар уни тортиб ичкарига қайтаришга муваффақ бўлган.

АҚШ Федерал авиация маъмурияти (FAA) ҳодиса Boeing 737 NG самолётида содир бўлганини тасдиқлади. Бу Boeing 737 MAX авлодидан олдинги модел ҳисобланади. Boeing компанияси ҳам терговга кўмаклашаётганини маълум қилган. 

“Биз мижозимиз Ryanair билан алоқада бўлиб турибмиз ва уни қўллаб-қувватлашда давом этмоқдамиз”, дейилган компания баёнотида.

Ryanair самолёт модели ва двигатели ҳақидаги қўшимча саволларга изоҳ бермаган. Компаниянинг таъкидлашича, самолёт одатий тарзда қўнган ва барча йўловчилар терминалга қайтарилган. Греция маҳаллий ОАВлари маълумотига кўра, парвоз бошида двигатель қисмидаги бир бўлак узилиб чиқиб, самолёт ойнасига урилган. Бу эса салонда босимнинг кескин пасайишига олиб келган. 

Шунга ўхшаш ҳодиса 2018 йилда ҳам Boeing 737 NG самолётида содир бўлган эди. Ўшанда “Southwest Airlines” самолёти двигателидаги вентилятор парраги синиб, ойна шикастланган ва бир йўловчи қисман ташқарига тортилиб кетиб ҳалок бўлган. 43 ёшли аёл тўққиз йил ичида АҚШ йўловчи авиакомпанияси рейсида ҳалок бўлган илк қурбон бўлган эди.

Ушбу ҳодисадан кейин АҚШ Миллий транспорт хавфсизлиги кенгаши Boeing компаниясига 737 NG самолётларидаги двигатель қопламаси конструкциясини қайта ишлаб чиқишни тавсия қилган. FAA эса 2023 йилда мазкур ўзгаришларни 2028 йил июлигача амалга оширишни мажбурий қилган.

Эслатиб ўтамиз, аввалроқ Гаитида кичик самолёт фавқулодда тарзда денгизга қўнишга мажбур бўлган эди.