“Zil” bilan to‘qnashgan Nexia yonib ketdi. Qurbon bor 

Bugun, 19 noyabr kuni Sirdaryo viloyatida “Zil” yuk avtomobili bilan to‘qnashgan Nexia yonib ketdi. Oqibatda haydovchi voqea joyida vafot etgan. Bu haqda Ichki ishlar yo‘l harakati xavfsizligi bosh boshqamasi Matbuot xizmati xabar berdi. 

Qayd etilishicha, voqea soat 14:25 atrofida viloyatning Mirzaobod tumani hududidan o‘tuvchi M-34 avtomobil yo‘lining 132-kilometrida sodir bo‘lgan. Haydovchi A.N. boshqaruvidagi Nexia rusumli hamda haydovchi N.Q. boshqaruvidagi "Zil-MMZ 554" rusumli yuk avtomobili ishtirokida to‘qnashuv sodir bo‘lgan va Nexia avtomobilida yong‘in yuzaga kelgan.

To‘qnashuv va yong‘in oqibatida Nexia rusumli avtomobil haydovchisi A.N. olgan og‘ir tan jarohatlari tufayli voqea joyida vafot etgan.

Xabarga ko‘ra, mazkur YTH yuzasidan Mirzaobod tumani IIB huzuridagi TB tomonidan tergovga qadar tekshiruv harakatlari olib borilmoqda. 

“Barcha haydovchilardan belgilangan qoidalarga rioya qilishlarini so‘raymiz”, deyiladi xabarda. 

Eslatib o‘tamiz, joriy yilning 22 oktyabr kuni Farg‘ona shahridagi neftni qayta ishlash zavodi yaqinida tashkilotga tegishli bo‘lgan avtobus yonib ketgandi. Bundan avval, 13 oktyabr kuni Toshkent shahrida Lacetti bilan to‘qnashgan Nexia yonib ketgandi.