Jizzaxda “Hyundai Santa FE” yonib ketdi

Bugun, 21 iyul kuni Jizzax viloyati Paxtakor tumanida “Hyundai Santa FE” mashinasi yonib ketdi. Bu haqda viloyat Favqulodda vaziyatlar vazirligi Matbuot xizmati xabar berdi.

Qayd etilishicha, soat taxminan 16:14 da viloyat FVBga Paxtakor tumani hududida yengil mashina yonayotgani to‘g‘risida ma’lumot kelib tushgan. Hodisa joyiga darhol qutqaruvchilar bo‘linmasi yuborilgan. Ular soat 16:30 da yong‘in voqea joyga yetib borgan, soat 16:40 da alanga o‘chirilgan.

Dastlabki ma’lumotlarga ko‘ra, 1979 yilda tug‘ilgan fuqaro J.Ye. boshqaruvida bo‘lgan “Hyundai Santa FE” rusumli yengil avtomobil Paxtakor-Jizzax yo‘nalishida harakatlanib ketayotgan bo‘lgan. Biroq Paxtakor tumani “Chamanzor” QFY hududidan o‘tuvchi avtomobil yo‘lining 1-kilometrida mashinaning motor qismida yong‘in chiqqan.

Xabarga ko‘ra, yong‘inni mustaqil o‘chirmoqchi bo‘lgan haydovchining harakatlari befoyda ketgan. Yong‘in haqida guvohlardan biri 101 qisqa raqami orqali viloyat FVBga xabar bergan.

Yong‘in oqibatida mashina to‘liq yonib ketgan va yaroqsiz holatga kelib qolgan. Jabrlanganlar yo‘q.

Ko‘rilgan moddiy zarar miqdori taxminan 586 million so‘mni tashkil etgan.