Jinoyat ishi qo‘zg‘atildi: Angrendagi YTHda 7 kishi vafot etgan

Avval xabar berilganidek, bugun, 24 may kuni soat 09:30 larda Angren shahridan o‘tuvchi A-373 avtomobil yo‘lida 8 ta avtomobil ishtirokida yo‘l-tranport hodisasi sodir bo‘ldi. Holat yuzasidan jinoyat ishi qo‘zg‘atilgan. Bu haqda Ichki ishlar vazirligi huzuridagi Tergov departamenti xabar berdi.

Favqulodda vaziyatlar vazirligi bergan axborotda YTH oqibatida 5 kishi halok bo‘lgani, 4 nafar fuqaro turli darajadagi tan jarohati olgani ma’lum qilingandi. Tergov departamenti bergan ma’lumotga ko‘ra, yo‘l-transport hodisasida 7 kishi vafot etgan, 14 kishi olgan tan jarohatlari bilan shifoxonaga murojaat qilgan.

Mazkur holat yuzasidan Toshkent viloyat IIBB huzuridagi Tergov boshqarmasi tomonidan O‘zbekiston Respublikasi Jinoyat kodeksining 266-moddasi 3-qismi “a” bandi (Transport vositalari harakati yoki ulardan foydalanish xavfsizligi qoidalarini buzish, odamlar o‘limiga sabab bo‘lsa) bilan jinoyat ishi qo‘zg‘atilgan.

Hozirda tergov harakatlari olib borilmoqda.