Jazoni kuchaytiradigan sun’iy intellektga ega zamonaviy qamoqxona tashkil qilinadi (video)

AQSHda sun’iy intellektga ega Cognify deb nomlanuvchi kelajak qamoqxonasining loyihasi taqdim etildi. Bu haqda loyiha muallifi yamanlik molekulyar biolog Hoshim Al Gayli o‘z sahifasida ma’lum qildi.

Olim kelajakdagi qamoqxona konsepsiyasini e’lon qildi. Uning ta’kidlashicha, loyiha amalga oshsa, bu jinoyatchining ozod etilishini yillar yoki o‘n yilliklar o‘rniga bir necha daqiqaga tezlashtiradi. Cognify dizayni insonning miyasiga jinoyat haqidagi sintetik xotiralarni joylashtiradi va o‘lgan odamning unga nima demoqchiligini ko‘rsatadi.

Mazkur qamoqxona jinoyatchilarga sodir etgan barcha yovuzliklarini o‘zlarida his qilishlari va o‘tmishlaridan saboq olishlariga imkon berishi kutilmoqda. Cognify tizimi miya implantati va sodir etilgan jinoiy kadrlarni translyatsiya qiladigan qurilmani o‘z ichiga oladi. Qurilma mahbusga oiladagi zo‘ravonlik, nafrat bilan bog‘liq jinoyatlar, kamsitish, odam savdosi, o‘g‘rilik va firibgarlik kabi jinoyatlar haqida sun’iy intellekt tomonidan yaratilgan xotiralarini ko‘rsatish orqali ishga tushadi. Vizual effektlardan tashqari, texnologiya jinoyatchiga jabrlanuvchining azobini his qilishiga imkon beruvchi o‘ziga xos jazo ham qo‘llashi mumkin.

“An’anaviy qamoqxonalarda qurilish va ta’mirlash ishlarini olib borish, u yerda xodimlarni moddiy jihatdan ta’minlash hamda mahbuslarni saqlash, jumladan, oziq-ovqat, sog‘liqni saqlash va reabilitatsiya dasturlari uchun katta byudjet sarflandi. Uzoq muddatli qamoq jazolarini sun’iy xotira implantatsiyasi orqali qisqa, intensiv reabilitatsiya bilan almashtirish orqali qamoqxona muassasalarini saqlash va mahbuslar uchun ketadigan xarajatlarini keskin kamaytirish mumkin”, degan loyiha egasi.

Cognify har bir mahkum haqidagi maxfiy ma’lumotlar va uning reabilitatsiyasi to‘g‘risidagi ma’lumotlar bazasiga ega bo‘ladi.