Jastin Tryudo o‘z iste’fosini e’lon qildi (video)

Kanada Bosh vaziri Jastin Tryudo hukmron Liberal partiya raisi lavozimini tark etishini, ammo Bosh vazirlikdan partiyaning yangi rahbari saylangandan keyin iste’foga chiqishini ma’lum qildi. Bu haqda u bugun, 6 yanvar kuni xalqqa qilgan maxsus murojaatida so‘z ochdi.

“Men Liberal partiya yetakchisi va Bosh vazir lavozimidan partiyamiz o‘zining navbatdagi yetakchisini tanlagach iste’foga chiqishni reja qilyapman”, dedi u.

Shuningdek, Tryudo Kanada general-gubernatori Meri Saymondan parlament faoliyatini 24 martgacha to‘xtatishni so‘ragan. Bu chora muxolif partiyalar tomonidan yanvar oxiriga rejalashtirilgan ishonchsizlik votumini o‘tkazishga to‘sqinlik qilish uchun zarur. 

Ma’lumot uchun, 2024 yilning 16 dekabrida Bosh vazir o‘rinbosari va Moliya vaziri Xristya Friland boshqa ishga o‘tishi sababli iste’foga chiqqanini e’lon qilgandi. Xuddi shu kuni Uy-joy qurilishi, infratuzilma va jamoat vaziri Shon Freyzer ham hukumatni tark etishini ma’lum qildi. Bu vaziyat muxolifat va jamoatchilik vakillari tomonidan Tryudoga bo‘lgan tanqidni kuchaytirdi. Ular hukumatni nazorat qilishdagi qobiliyatsizligi tufayli Bosh vazirning darhol iste’foga chiqishini talab qildi. Bundan tashqari, Liberal partiya a’zolari orasida ham Tryudoning rahbarlik lavozimini tark etishi kerakligi haqida chaqiriqlar yangradi. O‘tgan yil oxirida ilgari Tryudoga sodiq bo‘lgan Yangi demokratik partiya yetakchisi Jagmit Singh 2025 yilda hukumatga qarshi ovoz berishini va’da qildi. Bu muxolifatdagi Konservativ partiya uzoq vaqt davomida intilgan hukumatni iste’foga chiqarish harakatlariga qo‘shimcha kuch berdi. 

Ma’lumot o‘rnida, Jastin Tryudo 2013 yilda Liberal partiya rahbari etib saylangan va 2015 yilda partiya parlament saylovlarida g‘alaba qozongach, Kanada Bosh vaziri bo‘lgan. U o‘sha paytda mamlakat tarixidagi eng yosh Bosh vazirga aylangan edi.

Tryudo siyosiy sulola vakili hisoblanadi. Uning otasi Per Elliot Tryudo ham Kanadaning sobiq bosh vaziri bo‘lib, u ushbu lavozimni 1968-1979 va 1980-1984 yillarda egallagan.

Jastin Tryudoning yetakchiligida Liberal partiya bir necha bor yirik siyosiy yutuqlarga erishgan, ammo uning boshqaruvi davrida ko‘plab tanqidlar va murakkab siyosiy qarorlar ham yuzaga kelgan.