Janubiy Koreyadagi o‘rmon yong‘inlari qurbonlari soni ortdi. O‘t o‘chirayotgan vertolyot ham qulab tushdi (video)

Janubiy Koreyaning janubi-sharqiy mintaqasida davom etayotgan o‘rmon yong‘inlarida halok bo‘lganlar soni 24 kishiga yetdi va bugun, 26 mart kuni yong‘in o‘chirish vertolyoti qulashi oqibatida uning uchuvchisi ham halok bo‘ldi. Bu haqda “Yonhap” xabar berdi. 

Hukumatning ta’kidlashicha, halokatli o‘rmon yong‘inlari tez tarqalgan va 27,000 dan ortiq odamni uylarini tark etishga majbur qilgan. Kuchli shamol va quruq ob-havo tufayli yuzaga kelgan yong‘inlar butun mahallalarni vayron qildi, maktablarni yopib qo‘yildi va hukumat yuzlab mahbuslarni qamoqxonadan ko‘chirishga majbur bo‘ldi.

“Biz eng yomon o‘rmon yong‘inlariga javoban barcha mavjud xodimlar va jihozlarni jalb qilmoqdamiz, ammo vaziyat yaxshi emas”, dedi  prezident vazifasini bajaruvchi Xan Dok Su 

Mahalliy politsiya xodimi Son Chang Xoning aytishicha, halok bo‘lganlarning ko‘pchiligi 60-70 yoshlardagi keksa odamlardir.

O‘rmon xizmati esa yong‘inga qarshi vertolyotlaridan biri yong‘inni o‘chirishga urinayotganda halokatga uchragan va uchuvchi halok bo‘lganini ma’lum qildi.

Meteorologiya agentligi ertaga, 27 mart kuni Janubiy Koreya bo‘ylab yomg‘ir yog‘ishini prognoz qildi, ammo yong‘in sodir bo‘lgan hududlarda atigi 5 dan 10 mm gacha yog‘ingarchilik kutilmoqda.

Hukumat zarar ko‘rgan hududlarni maxsus ofat zonalari deb belgilagan va yong‘inlar 15 000 gektardan ortiq maydonga zarar yetkazganini aytdi.