Zelenskiy Rossiyada G‘arb qurollaridan foydalanmasligini aytdi

Ukraina G‘arbning uzoq masofali qurollaridan Rossiya hududiga hujum qilish uchun foydalanmoqchi emas. Bu haqda kecha, 8 mart kuni Ukraina Prezidenti Vladimir Zelenskiy CNN telekanaliga bergan intervyusida aytib o‘tdi.

“Bizni Rossiya yerlari qiziqtirmaydi. Bizda Dneprning narigi tomonidan otilgan o‘qlarga javob beradigan qurolimiz yo‘q. Shuning uchun men uzoq masofaga uchuvchi qurollarga ehtiyoj borligini ta’kidlayman. Agar ruslarni bu qurollar bilan yanada uzoqroqqa itarib yubora olsak, ular keyin tahdid qila olmaydi”, deydi Zelenskiy. 

Shuningdek, u 1991 yilgi chegaralar doirasidagi butun hududni Ukraina hududi deb bilishini qayd etgan. Shu bilan birga, Zelenskiy Ukraina hech qanday holatda Rossiya Prezidenti Vladimir Putin bilan muzokaraga tayyor emasligini aytgan. 

“Hech qanday sharoitda biz Rossiya Federatsiyasi Prezidenti bilan gaplashmaymiz. Biz unga ishonmaymiz Rossiya Ukraina hududini tark etsagina diplomatik yo‘l bilan yechim topish mumkin. Shundan so‘ng biz hamkorlarimiz bilan to‘g‘ri formatni topamiz”, degan Ukraina rahbari.