Zelenskiy Fransiyaning oliy mukofotini oldi

Ukraina Prezidenti Vladimir Zelenskiy kecha, 8 fevral kuni Buyuk Britaniyaga tashrifini yakunlab, yana Yevropa bo‘ylab safarini davom ettirdi. Uning navbatdagi manzili Fransiya bo‘ldi. 

Rasmiy uchrashuvlardan so‘ng Fransiya Prezidenti Emmanuel Makron ukrainalik hamkasbi Vladimir Zelenskiyni Fransiyaning oliy mukofoti – “Faxriy legion” ordeni bilan taqdirladi. U mukofotdan olingan videoni bugun, 9 fevral kuni Twitter’dagi sahifasiga joylashtirdi.

“Men Ukraina va uning xalqiga hurmat-ehtiromimni izhor etaman. Vladimir, sizga jasorat va qat’iyatingiz uchun hurmatimni bildiraman”, deb yozdi Makron.

Videoda Zelenskiy Makronga o‘z minnatdorligini bildirganini ko‘rish mumkin.

“Menimcha, bu men uchun juda ko‘p. Shuning uchun biz bu unvonni butun Ukraina xalqiga, jamiyatiga bag‘ishlaymiz. Bu yerda bo‘lish men uchun katta sharaf. Qo‘llovingiz uchun katta rahmat”, deydi Zelenskiy.

Ma’lumot uchun, “Faxriy legion” ordeni Napoleon Bonapart tomonidan 1802 yil 19 mayda tashkil etilgan. Orden sohiblari Fransiyadagi eng oliy sharaf va alohida xizmatlarga ega insonlar sifatida rasman tan olinadi. Fransiyaning eng mashhur rahbarlaridan biri Sharl de Goll ham “Faxriy legion” ordenini “tirik elita jamoasi” deb atagan. 

Eslatib o‘tamiz, kecha, 8 fevral kuni Zelenskiy Buyuk Britaniyaga borgan, u yerda qirol Charlz III, Bosh vazir Rishi Sunak bilan uchrashgan va Britaniya Parlamentida nutq so‘zlagan edi. Shuningdek, tashrif doirasida Zelenskiy Britaniyada tayyorgarlik ko‘rayotgan Ukraina harbiylari bilan ham ko‘rishgandi. Britaniya safaridan so‘ng u Makron va Shols bilan uchrashish uchun Parijga kelgan. Bugun esa Zelenskiyning Bryusselda Yevropa Ittifoqi sammitida ishtirok etishi kutilmoqda.

Alibek Beyjanov