Zelenskiy bilan uchrashgan Erdo‘g‘anga Putin telefon qilgani yo‘q – Peskov 

Rossiya Prezidenti Vladimir Putin Ukraina yetakchisi Vladimir Zelenskiy bilan Istanbulda muzokaralar o‘tkazgan turkiyalik mavqedoshi Rajab Toyib Erdo‘g‘anga hali qo‘ng‘iroq qilmadi. Bu haqda Rossiya Federatsiyasi Prezidenti matbuot kotibi Dmitriy Peskov ma’lum qildi.

Jurnalistlar “Bunday telefon suhbati allaqachon bo‘lib o‘tganmi yoki yaqin kelajakdami” mazmunida savol bergan.

"Hali emas", deya javob bergan Kreml vakili. 

Shuningdek, u Rossiya va Turkiya yetakchilari Vladimir Putin va Rajab Toyib Erdo‘g‘an o‘rtasida muloqot bo‘lishi mumkinligi, ammo aniq sanalar hali aniq emasligini aytgan.

Eslatib o‘tamiz, oldinroq Erdo‘g‘an va Zelenskiy Istanbulda muzokara o‘tkazgan edi. Ularning asosiy mavzulari orasida NATOning Vilnyusdagi sammiti oldidan ikki davlat pozitsiyalarini muvofiqlashtirish, Ukraina xavfsizligi kafolatlari, don bitimi, korxonalar o‘rtasidagi mudofaa sohasidagi hamkorlik kabilar bo‘lgan. Ushbu muzokaralardan so‘ng Erdo‘g‘an kelasi oyda Putin bilan uchrashi mumkinligi, “kelgusi davrda” ular telefon orqali aloqalarni davom ettirishini aytdi. Kreml ham Istanbul muzokaralari natijalarini yaqindan kuzatib borganini qayd etib, Putin va Erdo‘g‘an o‘rtasidagi aloqalarni istisno etmadi.